Bas áskerı prokýratýra sarbaz Bekbol Mırashtyń ólimine qatysty úkimmen kelispeı otyr

Bas áskerı prokýror Dastan Sákenov «Shóldala» shekara beketinde qaıtys bolǵan sarbazdyń óliminen keıin sottalǵan aǵa serjantqa qatysty shyqqan úkimmen kelispeıtinin aıtty. Sondyqtan áskerı prokýratýra isti bolǵan aǵa serjantqa taǵy bir aıyp taǵý boıynsha tergeý júrgizip jatyr, dep habarlaıdy QazAqparat tilshisi.

Eske salsaq, 24 tamyzda Shymkent garnızony soty Jambyl oblysy «Shóldala» shekara beketinde qaıtys bolǵan sarbaz Bekbol Mırashtyń ólimine qatysty kúdikke ilinip, aıyptalǵan 40 jastaǵy aǵa serjant A. Nurtaıdy «Ózin-ózi óltirýge deıin jetkizý» babymen aqtap shyqty. Biraq sot ony «Qyzmetin asyra paıdalaný» jáne «Aqshany qorqytyp alý» babymen kináli dep tanyp, úsh jarym jylǵa bas bostandyǵynan aıyrdy. Bul turǵyda sýdıa «Ózin-ózi óltirýge deıin jetkizý» baby boıynsha taǵylǵan aıyp dáleldenbedi dedi.

Bas áskerı prokýrordyń aıtýynsha, «Shóldala» shekara zastavasynda sarbazdyń ólimine qatysty sot úkimi shyqqanymen, bul isti áskerı prokýratýra «Ózin-ózi óltirýge deıin jetkizý» baby boıynsha tergep jatyr.

«Úkim shyǵarylǵan kezde sarbazdyń ózine qol jumsaýǵa deıin jetkizý isi jeke shyǵaryldy. Biz sol úkimge narazylyq bildiremiz. Bizdińshe, B. Mırashtyń óz-ózine qol salýy kelisimshart boıynsha qyzmet etip júrgen áskerıdiń áreketinen boldy», - dedi D. Sekenov Senattyń jalpy otyrysynan keıin tilshiler suraǵyna jaýap bere otyryp.

Sonymen qatar ol qaıtys bolǵan mirzimdi áskerı qyzmettegi sarbazdyń kıiminen jynystyq uryq materıaldary tabyldy degen nusqany joqqa shyǵardy.

«Bul másele bireneshe ret kóterilgen edi. Ol jerde uryq materıaldary tabyldy dep naqty aıtýǵa bolmaıdy. ıAǵnı onda basqa bıologııalyq zattar anyqtaldy. Sondyqtan birneshe ret taldaý jasap, genetıkalyq zertteý boldy. Onyń nátıjesinde atalǵan nusqa rastalmady. Bul oqıǵa boıynsha seksýaldy zorlyq-zombylyq bolmaǵanyn naqty aıta alamyn», - dedi Dastan Sekenov.

Bas áskerı prokýratýra 2022 jyldyń tamyzynda «Shóldala» shekara zastavasynyń merzimdi áskerı qyzmetshisi B.Mırashtyń óz-ózine qol salý deregine qatysty tergeý barysyn málimdedi.

«Búgingi kúni bılikti asyra paıdalaný arqyly ózin-ózi óltirýge deıin jetkizý boıynsha kúdikti retinde sol zastavanyń kelisimshart boıynsha áskerı qyzmetshisi tergelýde. Qylmystyq is materıaldaryna sáıkes ol B.Mırashty jáne onymen birge áskerge shaqyrylǵan basqa da merzimdi áskerı qyzmetkerlerdi júıeli túrde psıhologııalyq turǵyda qorlap, soqqyǵa jyqqan. Kúdikti qamaýǵa alynyp, tergeý jalǵasýda jáne erekshe baqylaýǵa alynǵan», - dep jazdy vedomstvodan.

Bıyl tamyz aıynda atalǵan derek boıynsha qyzmettegi bes adam laýazymynan bosatyldy.