«Barys» hokkeı klýbynyń kapıtany Abaıdyń ánin qazaqsha shyrqady

NUR-SULTAN. QazAqparat – «Barys» hokkeı klýbynyń kapıtany ári qorǵaýshysy Darren Dıts Abaıdyń 175 jyldyǵyna arnalǵan estafetaǵa ún qosty, dep habarlaıdy QazAqparat.

Hokkeıshiniń qazaqy shapan kıip, shyrqaǵan ániniń vıdeosy «Barystyń» keshegi «Metallýrgpen» pleı-off matchy kezinde kórsetildi. Ol Abaıdyń «Kózimniń qarasy» ánin qazaqsha oryndap berdi.

Vıdeojazba «Barys» hokkeı klýby jankúıerleriniń Instagram paraqshasynda jarııalandy.

Eske sala ketsek, uly aqynnyń óleńderin oqýǵa arnalǵan #Abai175 estafetasyn alǵash ret 9 jasar mektep oqýshysy bastap, Memleket basshysy Qasym –Jomart Toqaevqa joldaǵan bolatyn. Prezıdent ony Bilim jáne ǵylym mınıstri Ashat Aımaǵambetovke jáne búkil álemdi moıyndatqan talantty ánshi Dımash Qudaıbergenge joldaǵan edi.

Odan keıin Reseıdiń halyq ártisi Igor Krýtoı Dımash Qudaıbergen joldaǵan estafetany qabyl alǵan edi.

Sonymen qatar, chellendjdi «QazAqparat» halyqaralyq aqparat agenttiginiń ujymy «Egemen Qazaqstan» gazetinen qabyl alyp, Abaıdyń «Kózimniń qarasy» ánin shyrqady jáne estafetany «Tatar-Inform» aqparat agenttigine, Qyrǵyz Respýblıkasynyń «Kabar» ulttyq aqparat agenttigine, «Tengrinews» jáne NUR.KZ portaldaryna joldady.