«Barymtashylar. Ýaqyt joldary» fılmi Býsan kınofestıvaliniń ashylýynda kórsetiledi

NUR-SULTAN. QazAqparat - Qazaqstan men Japonııa birlesip túsirgen «Barymtashylar. Ýaqyt joly» atty tolyqmetrajdy fılminiń álemdik tusaýkeseri Azııadaǵy eń iri festıvaldiń biri – 3-12 qazan aralyǵynda ótetin 24-shi halyqaralyq Býsan kınofestıvali sheńberinde ótedi, dep habarlaıdy QazAqparat «Qazaqfılm» kınostýdııasyna silteme jasap.

Atalǵan fılm 5 000-nan astam kórermenderdi jınaıtyn Ońtústik Koreıanyń eń úlken kıno alańy – Býsan kıno ortalyǵynda (Busan Cinema Center) festıvaldiń ashylý saltanatynda kórsetiledi. Aıta ketsek, bul ortalyq festıvaldiń ashylý jáne jabylý saltanatynda ǵana jumys isteıdi.

Esterińizge sala ketsek, «Barymtashylar. Ýaqyt joldary» fılminiń óndirisin Qazaqstan tarapynan QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ iske asyrsa, japon tarapynan – «Tokyo New Cinema» kompanııasy júzege asyryp otyr. «Barymtashylar. Ýaqyt joly» fılmi jylqy baǵýmen aınalysatyn qarapaıym otbasy týraly baıandaıdy. Bir kúni jylqy úshin adam óltirýden taıynbaıtyn barymtashylar otaǵasyn óltiredi. 12 jasar Oljas barymtashylardyń qolynan mert bolǵan ákesiniń ólimine qaıǵyryp, zulymdyqpen kúresip, otbasylaryna túsken aýyrtpalyqty qaryndastarymen birge keshedi. Qorǵansyz qalǵan Oljastyń otbasyna ǵaıyptan paıda bolǵan bógde bireý qol ushyn sozady.

«Fılmniń stsenarııi Qazaqstanda oryn alǵan shynaıy oqıǵaǵa negizdelgen. Jaqyndarynan aıyrylýdyń qandaı qıyn ekendigin osy oqıǵa arqyly kınematografııalyq tilmen jetkizgim keldi», - dedi rejısser Erlan Nurmuhambetov.

Aıta ketsek, fılmdi túsirýde tájirıbıeli ınternatsıonaldy top jumys istedi, olar: «Jańǵaq tal» fılmi úshin 20-shy Býsan kınofestıvaliniń «Jańa tolqyn» (New Currents) baǵdarlamasynda úzdik atanyp, Bas júldeni ıemdengen rejısser Erlan Nurmuhambetov (Qazaqstan), fılmniń teń rejısseri Lıza Takeba (Japonııa), japondyq prodıýser Sedzo Ichııama (Takesha Kıtano, Tszıa Djangke, Hoý Sıaosıanıa syndy tanymal rejısserler túsirgen fılmderdiń prodıýseri), prodıýserıÝlııa Kım (Qazaqstan/Frantsııa), Berlın kınofestıvalinde «Aslannyń sabaqtary» fılmi úshin «Kúmis Aıý» júldesimen marapattalǵan qoıýshy operatory Ázız Jambakıev (Qazaqstan).

Fılmde basty rólderdi Kann kınofestıvalinde úzdik aktrısa atanǵan Samal Eslıamova (Qazaqstan), tanymal qazaqstandyq akter Dýlyǵa Aqmolda jáne japondyq akter Mıraı Morııama somdaıdy. Sondaı-aq fılmge Mádı Mınaıdarov esimdi jas akter tústi (Oljastyń rólinde).

«Eki eldiń kınematografısteri birlesip túsirgen fılmge túskenime qýanyshtymyn. Túsirilim jumystary Qazaqstannyń kórkem jerlerinde ótti. Japondyq akter Mıraı Morııama óte jaqsy akter, onymen birge jumys isteý óte unady», - dedi Samal Eslıamova.

«Barymtashylar. Ýaqyt joldary» fılmi Býsan kınofestıvaliniń ashylý saltanatynda – 2019 jyly 3 qazanda kórsetiledi.

Aıta keterligi, Halyqaralyq Býsan kınofestıvali eń alǵash ret 1996 jyldyń qyrkúıek aıynda ótkizilgen bolatyn. Jyl saıyn bul kıno alańynda ár eldiń akterleri, rejısserleri men prodıýserleri, sondaı-aq kıno óneriniń tabynýshylary bas qosady. Atalǵan festıval azııalyq jáne Ońtústik Koreı elinde túsirilgen fılmderin nasıhattaýǵa baǵyttalǵan basty baıqaý.