Barsha Qazaqstan halqyn árbir eldi mekende aq jaýlyqty analarǵa arnalǵan baq jasaýǵa shaqyramyz - Gózel Quljabaeva
Onda: «Qurmetti otandastar! Ardaqty aǵaıyn! Bıylǵy jyldy memleketimiz «Analar jyly» dep belgiledi. Biz osyǵan oraı jáne Elbasy N.Á.Nazarbaevtyń bastamasyna qoldaý bildire otyra, «Analarǵa arnalǵan baq jasaıyq» atty uranymen barsha Qazaqstan halqyn «Dástúrli aǵash egý merekesine» shaqyramyz», - delingen.
Baspasóz máslıhatynda atalmysh bastamany kótergen, Ulybrıtanııanyń «Vıktorııa hanym» syılyǵynyń ıegeri, «Gúlzar» qoǵamdyq birlestiginiń basshysy Gózel Quljabaeva: «Anadan asqan ardaqty jan joq. Patshany da, batyrdy da ómirge ákeletin ana. Barsha aq jaýlyqty analarymyzǵa arnap, baq jasasaq, eń áýeli analarymyzǵa kórsetken zor qurmet bolyp, urpaqtarymyzdyń boıyna ádemilik pen sulýlyqty sińirer edi. Osyndaı ónegeli is bizdiń ósip-órkendeýimizge de úlken septigin tıgizeri anyq. Bizdiń bul bastamamyz elimizdiń ár óńirinde qoldaýǵa ıe bolady degen úmittemiz», -dedi.
Onyń aıtýynsha, aq jaýlyqty analarǵa arnalǵan baq «Batyr ana» baǵy dep atalmaq. ««Batyr ana» baǵyn 10 ga jerge jasaýdy josparlap otyrmyz. Aǵashtardy egý jumystary erteń bastalady. On bes kúnniń ishinde, ıaǵnı 15 sáýirge deıin óz birlestigimniń jáne aýyl turǵyndarynyń qoldaýymen 3 myńnan asa alýan túrli aǵashtar men 3 myń qylqan japyraqty aǵashtar men butalardy egýdi josparlap otyrmyz. Saıabaq Almaty oblysy, Kerbulaq aýdany, Basshı aýyldyq okrýginde boı kóteretin bolady. Biz aldyńǵy jyldary El táýelsizdiginiń jıyrma jyldyq merekesine oraı «ár aýyldyq okrýgte 20 myń aǵash» atty úndeý jarııalap, osy aýylda 20 gektar jerge aǵash egip, baq jasaǵan edik. Bul bastamamyz sol ıgi istiń jalǵasy desek bolady. Munda aǵashtardy egý jumystary bitkennen keıin turǵyndardyń demalýyna arnalǵan oryndyqtar qoıylady. Saıabaqty jasaýdan ózge biz baqtyń kire berisine «Batyr analarymyzdy» qurmetteý, taǵzym etý maqsatynda qazirgi ómirde bar batyr analardyń tizimin jasaımyz, al sol jaǵyna dúnıeden ótken «Batyr analarymyzdyń» esimderin tasqa jazatyn bolamyz. Baqtyń resmı túrdegi tanystyrylymyn Sizderdiń nazarlaryńyzǵa kúzde usynamyz», - dedi Gózel Quljabaev.
Uıymdastyrýshylardyń aıtýynsha, 6 myń aǵash Gózel Quljabaevanyń jeke qarjysyna satyp alynbaq. «Men úshin qansha qarajattyń ketetini mańyzdy emes. Anaǵa qandaı jaqsylyq jasasaq ta, qandaı eskertkish ornatsaq ta biz onyń paryzynan qutylmaımyz. Árbir aǵash qandaı da bir tirshilik ıesiniń paıdasyna assa, bir qus uıa salyp, jemisterin jese, bir adam kóleńkesine saıalap, kádesine jaratsa onyń ózi úlken saýapty is dep bilemin. Sonymen qatar, aǵashtyń ekologııalyq máseleni, ǵalamdyq jylynýdy retteýde mańyzy zor ekendigi barshamyzǵa aıan. Sondyqtan da men múmkindigim kelgenshe esh nárseden aıanbaı elim úshin, memleketimniń gúldenýi úshin qyzmet etkim keledi», - dedi G. Quljabaeva.
Degenmen de, bizge saıabaqty jasaýǵa 3 mıllıon teńge jumsalatyndyǵy belgili boldy.
Atalmysh bastamaǵa qazirdiń ózinde halyqaralyq, ekologııalyq uıymdar, Basshı aýylynyń turǵyndary men aýyl ákimdigi qoldaý bildirgen.
«Biz bul ıgi bastamaǵa qoldaý bildiremiz. Árbir sheneýnik pen kásipker Gózel Quljabaevadaı bolsa elimiz gúldengen baqqa aınalar edi. Bul aqyldy da, el ekologııasynyń jaqsarýyna yqpal etetin ıgilikti bastama», - dep atap ótti «Tabıǵat» ekologııalyq odaǵynyń basshysy Mels Eleýsizov baspasóz máslıhatynda.