Báriniń aıaǵyna oq tıgen: Aqtóbedegi tóbelesten soń 8 jigit em alyp jatyr
Aqtóbe oblystyq Polıtsııa departamenti osy tóbeleske qatysqan 4 kúdiktini ustap, qazir Qylmystyq kodekstiń «Adam óltirý», «Buzaqylyq» baptary boıynsha tergeý júrgizip jatyr.
Al 8 jigit oblystyq kópsalaly aýrýhanasynda. Olardyń báriniń aıaǵyna bytyra tıgen.
- Túnde saǵat shamamen 2:00-de belgisiz bireý jas jigitti ákeldi. Klınıkalyq ólim jaǵdaıynda jetkizildi. Onyń ómirin saqtap qalý úshin bar jaǵdaı jasalǵanymen, kóptegen pyshaq jaraqatynan, oq jaraqatynan kóz jumdy. Sodan keıin jas jigitterdi ákele bastady. Barlyǵy taǵy 8 jigit jetkizildi. Olar 2002-2006 jyldar aralyǵyndaǵy jigitter. Báriniń aıaǵynda bytyra jaraqaty boldy. Olarǵa em-dom kórsetilip jatyr. Báriniń jaǵdaıy turaqty. Jansaqtaý bóliminde jatqan eshkim joq. Olardyń stýdent nemese oqýshy ekeni belgisiz. Kimder ekenin naqty aıta almaımyz. Bárine kúzet qoıylǵan. Olardy jeke kólikpen, keıbirin polıtsııa ákeldi,- dedi Aqtóbe oblystyq kópsalaly aýrýhanasy travmatologııa bóliminiń travmatolog dárigeri Jaslan Ýrýmbaev.
Aıta keteıik, tóbeles kezinde pyshaq jáne oq jaraqatynan kóz jumǵan jigittiń jasy 18-de bolǵan. Ázirge tóbelestiń sebebi aıtylmady.