Barlyq syrtqy zaımdar tyńǵylyqty eseptelýli tıis - Nurlan Nyǵmatýlın

ASTANA. QazAqparat - QR Parlamenti Májilisiniń spıkeri Nurlan Nyǵmatýlınniń tóraǵalyǵymen ótken palatanyń jalpy otyrysynda jergilikti ózin-ózi basqarýdy damytý máseleleri boıynsha zań jobasy ekinshi oqylymda maquldandy, dep habarlaıdy QazAqparat.

Zań jobasy aýdandyq mańyzy bar qalalar, aýyldar, kentter, aýyldyq okrýgter deńgeıinde derbes bıýdjetti kezeń-kezeńmen engizýge jáne jergilikti ózin-ózi basqarýdyń kommýnaldyq menshigi ınstıtýtyn engizýge, sondaı-aq jergilikti ózin-ózi basqarý organdarynyń bıýdjettik protsestegi ókilettikterin odan ári keńeıtýge baǵyttalǵan.

Talqylaý barysynda Májilis tóraǵasy Memleket basshysynyń bıýdjettik qarjyny tıimdi ıgerý týraly tapsyrmasyna ekpin qoıdy.

«Memlekettiń kepildigimen tartylatyn qaryz barlyq memlekettik organdardyń erekshe nazarynda bolýy tıis. Atap aıtqanda, Prezıdent bıýdjetti tıimdi paıdalaný boıynsha maqsat-mindetti  únemi tapsyryp keledi»,-dedi Nyǵmatýlın.

Sonymen qatar ol barlyq syrtqy zaımdar tyńǵylyqty eseptelýi kerektigin qadap aıtty. Bul turǵyda elimizdiń óziniń rezervterine de nazar aýdarý qajet.

«Biz bıýdjet pen onyń oryndalýyn qarastyrǵan kezde, keıbir memlekettik organdar jyl qorytyndysy boıynsha mıllıardtaǵan qarjyny ıgermegenin baıqaımyz. Degenmen de bul memorgannyń syrtqy zaımǵa bet buryp otyrǵandyǵy da oryn alady. Zaım almas buryn, jeke rezervterdi paıdalanǵan durys bolar edi», -dedi Nyǵmatýlın.

Sóz sońynda Májilis tóraǵasy Úkimettiń óńirlerde atalǵan zańdy kásibı ári jaýkershilikpen júzege asyrýyna tilek bildirdi.