Barlyq meshitterde Jambyldaǵy jarylysta qaza bolǵandardyń rýhyna Quran baǵyshtaldy

NUR-SULTAN. QazAqparat – Búgin saǵat10.00-de búkil respýblıka boıynsha Jambyl oblysy Baızaq aýdanyndaǵy áskerı bólimniń oq-dári qoımasynda bolǵan jarylys saldarynan qaza bolǵan adamdardyń rýhyna Quran hatym duǵasy baǵyshtaldy, dep habarlaıdy QazAqparat tilshisi.

QR Prezıdenti Qasym-Jomart Toqaetyń 29 tamyzdy Jalpyulttyq aza tutý kúni dep jarııalaýyna baılanysty elimizdiń barlyq meshitterinde Jambyl oblysynyń Baızaq aýdanyndaǵy jarylys saldarynan qaza bolǵan marqumdardyń rýhyna Quran hatym duǵasy baǵyshtaldy. Nur-Sultan qalasynyń Áziret Sultan meshitinde ótken duǵa baǵyshtaý rásimi Qazaqstan musylmandary dinı basqarmasynyń áleýmettik jelidegi paraqshalary arqyly onlaın rejımde ótti.

«Búgingi Jalpyulttyq aza tutý kúninde Jambyl oblysy Baızaq aýdanyndaǵy oqys oqıǵaǵa baılanysty Qazaqstan musylmandary dinı basqarmasy eldegi meshitterdiń bárinde Hatym Quran túsirip, qaza bolǵan marqumdardyń rýhyna quran baǵytalyp jatyr. Hatym Quran degen qurandy basynan aıaǵyna deıin oqyp shyǵý. ıAǵnı, Quranda 114 súre bolsa, sonyń bárin tolyq oqyp shyǵýdy aıtady. Kesheden beri elimizdiń túkpir-túkpirinde ımamdarymyz, din qyzmetshileri, ustazdar, tipti meshitterdegi jamaǵattardyń atsalysýymen osy Quran hatym ár óńirde oqylyp jatyr. Áziret Sultan meshitindegi quran baǵyshtaý rásiminen áleýmettik jeli arqyly tikeleı kórsetilim jasadyq.

Bul marqumdar elimiz úshin, áskerı, qutqarý qyzmetinde júrip, órttiń ústinde qaza tapty. Mundaı qazany sharıǵatta «sháıit» dárejesinde dep sanaıdy. Óıtkeni, ol el qorǵaý úshin, qoǵamnyń tynyshtyǵyn saqtaý úshin jandaryn pıda etti.

Alla osy qaza bolǵan marqumdardyń rýhyn shattyqqa bólep, meıirimine bólep, aqyrette qııamet kúni jandaryn jánnatta shalqytsyn dep tileımiz», - dedi Qazaqstan musylmandary dinı basqarmasynyń naıb múftıi Ershat qajy Ońǵar.

Din ókilderi duǵa kezinde qaza bolǵan azamattardyń artynda qalǵan týystaryna sabyr, jaraqat alyp aýrýhanada jatqan jandardyń janyna shıpa tiledi.