Barlyq memlekettik standarttar Qazaqstan aýmaǵynda aqysyz júzege asyrylady

NUR-SULTAN. QazAqparat - Búgingi kúni barlyq memlekettik standarttar Qazaqstan aýmaǵynda aqysyz júzege asyrylýda. Bıylǵy jyldyń jańalyǵy - osy. Bul týraly Tehnıkalyq retteý jáne metrologııa komıtetiniń Ulttyq akkredıtteý ortalyǵy JShS bas dırektorynyń birinshi orynbasary Qaınar Taıjanov aıtty, dep habarlaıdy QazAqparat tilshisi.

«1 shildede jańa redaktsııada qabyldanǵan «Tehnıkalyq retteý týraly» zań kúshine enedi. Saýda jáne ıntegratsııa mınıstrligi 52-den astam normatıvtik quqyqtyq aktilerdi, onyń ishinde 11 memlekettik baqylaý aktilerin, 21 tehnıkalyq retteý týraly aktilerdi, sertıfıkattaý jáne akkredıtteý salasyndaǵy 9 normatıvtik quqyqtyq aktilerdi, sondaı-aq metrologııa jáne memlekettik qyzmetter týraly taǵy 11 normatıvtik quqyqtyq aktilerdi ázirleýde», - dep atap ótti spıker.

Onyń aıtýynsha, bul quqyqtyq aktiler akkredıtteý protsedýralaryn jetildirý máselelerine de qatysty. Atap aıtqanda, qaýipti ónimderdiń synamalaryn irikteý, ónimderdi shyǵarý jáne keri shaqyryp alý tetikterin retteý, naryqtyq qadaǵalaý ınstıtýtyn engizý, sondaı-aq baqylaý men qadaǵalaý protsesterin tsıfrlandyrý tájirıbesin júrgizý qajet bolady.

«Osy tapsyrma aıasynda 2021 jyly qaýipti ónimderdiń tizilimin Eýropanyń RAPEX júıesimen uqsastyǵy boıynsha engizý, elektrondy qaýipsiz basqarý júıesin engizý jáne standarttardyń jańa ınternet-dúkenin iske qosý josparlanýda. Búgingi kúni barlyq memlekettik standarttar Qazaqstan aýmaǵynda aqysyz engizilýde, bul - osy jyldyń jańalyǵy», - dedi ol.