Barlyq qazaqstandyqtardy azamattyq boryshyn óteýge shaqyramyn - Máýlen Áshimbaev

NUR-SULTAN. QazAqparat - "Nur Otan" partııasy tóraǵasynyń birinshi orynbasary Máýlen Áshimbaev kezekten tys QR Prezıdenti saılaýynda daýys berdi, dep habarlaıdy QazAqparat tilshisi.

Partııa ókili QR Ulttyq kitaphanasynda ornalasqan №111 saılaý ýchaskesinde jubaıymen jáne qyzymen keldi.

"Qazir saılaýda daýys berý protsesi júrip jatyr. Meniń kez kelgen pikirim halyqtyń tańdaýyna yqpal etpeýi tıis. Sondyqtan eshnárse aıta almaımyn. Bir ǵana aıtarym, qazaqstandyqtardyń saılaý ýchaskesine kelip, óz azamattyq boryshyn óteýge shaqyramyn. Bul - shyn máninde árbir qazaqstandyqtyń jaýapkershiligi. Búgin óte jaýapty kún, árbir qazaqstandyq óz úlesin qosýy qajet", - dedi Máýlen Áshimbaev.

Sonymen birge, QR Ulttyq qaýipsizdik komıtetiniń basshysy Kárim Másimov te №111 saılaý ýchaskesinde óz tańdaýyn jasady.

Aıta keteıik, QR Ulttyq kitaphanasynda ornalasqan №111 saılaý ýchaskesinde 4 661 turǵyn tirkelgen. Olardyń 600-ge jýyǵy alǵashqy úsh saǵatta daýys berip úlgerdi.

QR Prezıdentiniń kezekten tys saılaýynda el ishinde jáne shet elderde 9 968 daýys berý ýchaskesi jumys isteıdi. Saılaý týraly Konstıtýtsııalyq zańǵa sáıkes, daýys berý ýaqyty standartty (saǵat 7.00-20.00 aralyǵy) bolady.

Batys Qazaqstan, Aqtóbe, Atyraý, Mańǵystaý, Qyzylorda oblystarynda ýaqyt aıyrmashylyǵyna baılanysty saılaý ýchaskeleri jergilikti ýaqyt boıynsha saǵat 07.00-de - Nur-Sultan ýaqyty boıynsha saǵat 08.00-de ashyldy.