Barlyq aýyldardyń ishinde 5200-ge jýyǵynyń damý áleýeti ortasha

ASTANA. 4 qyrkúıek. QazAqparat - Barlyq aýyldardyń ishinde 5200-ge jýyǵynyń damý áleýeti ortasha bolyp esepteledi. Bul týraly búgin Úkimet otyrysynda Óńirlik damý vıtse-mınıstri Serik Jumanǵarın málim etti.

«Búgingi kúni respýblıkamyzdaǵy 6936 aýyldyq eldi mekenderde 7,6 mln. adam turady. Barlyq aýyldardyń ishinde 1310-nyń damý áleýeti joǵary, 5192-siniń damý áleýeti ortasha bolyp esepteledi. Ákimshilik mańyzy boıynsha aýyldyq eldi mekenderdiń 119-y aýdan ortalyqtary, 2411-i kenttik jáne aýyldyq okrýgterdiń ortalyqtary bolyp tabylady. Aýyldyq eldi mekenderdiń jartysynan astamy shaǵyn, ıaǵnı turǵyndarynyń sany 500 adamnan kem bolyp keletin aýyldar bolyp tabylatynyn jáne olarda aýyl halqynyń nebári 9,7 paıyzy turatynyn atap ótý kerek», - dedi vıtse-mınıstr. Onyń sózine qaraǵanda, aýyl sharýashylyǵynyń jalpy ónimi 2012 jyly 2 trln. teńgeni qurady nemese ol eldiń Іshki jalpy óniminiń 4,1 paıyzyna saı keledi. «Bul rette kóptegen aýyldyq eldi mekenderde temirjoldyń, taý-ken ónerkásibiniń, energetıka jáne ekonomıkanyń basqa da salalarynyń qurylymdary, sondaı-aq shaǵyn jáne orta bıznes nysandarynyń ornalasqanyn, munymen qosa olardyń el ekonomıkasynyń damýyna eleýli úles qosatynyn atap ótken jón», - dedi S. Jumanǵarın.