Barlyq ákimdikter sý tasqyny qaýpine daıyn bolýy qajet – mınıstr
«Tájirıbe kórsetkendeı qarastyrylǵan sý tasqynyna qarsy is-sharalardy oryndamaý úlken sý tasqyny saldaryna ákeledi. Mysaly, bıyl Batys Qazaqstan oblysynda 210 turǵyn úı, Aqtóbe oblysynda – 89 turǵyn úı, Qostanaı oblysynda – 44 turǵyn úı sý astynda qaldy. Bul rette Aqtóbe jáne Batys Qazaqstan oblystarynda 46 úı turýǵa jaramsyz dep tanyldy. Nátıjesinde Aqtóbe oblysynyń ákimdigi 24 úı, Batys Qazaqstan oblysynda – 16 úı salyndy. Jalpy 1,3 mlrd teńge jumsaldy. Jyl saıyn yqtımal qaýip pen úlken materıaldyq shyǵynǵa ushyraǵansha, osy qarajatty aldyn-ala eskertý úshin paıdalanýǵa bolar edi», - dedi TJ mınıstri Úkimet otyrysynda.
Sonymen birge, S. Sháriphanov sý basý qaýpi saqtalyp otyrǵan óńirlerdi atady.
«Aqtóbe oblysynda sý basqan eki eldi mekenniń (Qobda, Qaratal) qalpyna keltirý jumystary tek bireýinde (Qaratal) ǵana aıaqtaldy. Túrkistan, Jambyl jáne Almaty oblystarynda sý basý faktileri jyl saıyn aryq júıeleriniń daıyn bolmaýyna baılanysty tirkeledi. Qostanaı oblysynda josparlanǵan Jol kartasynyń
jartysy boıynsha ǵana jumys bastaldy. Osy aıtylǵandardy, jalpy klımattyń ózgerýi boıynsha álemdik úrdisti jáne osy kóktemde batys óńirinde sý tasqyny bir aı buryn bastalǵanyn eskerip, barlyq ákimdikter syn-qaterge daıyn bolýy qajet», - dep keńes berdi mınıstr.
Sala mınıstriniń aıtýynsha, ótken jyldardaǵy sý tasqynyn boldyrmaý úshin ákimdikter bıylǵy sý tasqynyna qarsy sharalarǵa barlyq qajetti resýrstardy tartýy qajet.
«Ekinshiden, bıyl jol kartasy aıaqtalatynyn eskerip, oryndalmaǵan sharalar Áleýmettik-ekonomıkalyq damýdyń keshendi jáne óńirlerdiń damý josparlaryna aýystyrylsyn. Ekologııa jáne tabıǵı resýrstar mınıstrligi gıdrotehnıkalyq qurylystardy ýaqytyly jóndeýi kerek. Indýstrııa jáne ınfraqurylymdyq damý mınıstrligine sý ótkizý qurylystaryn, joldar men kópirlerdi tasqyn jáne erigen sýlardyń joǵary kólemin ótkizýge daıyndaý qajet. TJ mınıstrligi Aqparat jáne qoǵamdyq damý mınıstrligimen, ákimdiktermen birlesip azamattardyń qaýipsizdik mádenıetin arttyrý úshin aryqtardy tazartý jáne qardy ýaqtyly shyǵarý boıynsha halyqpen tıisti aqparattyq jumysty jalǵastyrsyn», - dedi Syrym Sháriphanov.