Barlyq ákimder «Qoljetimdi baspana-2020» baǵdarlamasy aıasynda bıylǵa josparlaǵan turǵyn úı kólemin mindetti túrde paıdalanýǵa berýi tıis - S.Ahmetov
Búgin «Qoljetimdi baspana-2020» baǵdarlamasynyń júzege asyrylý barysy keńinen talqylanǵan Úkimet otyrysynda QR Premer-Mınıstri Serik Ahmetov osylaı dedi.
«Ákimderge baǵdarlama aıasynda josparlanǵan kólemderdi sózsiz engizýdi, bıýdjet qarajatyn ıgerý boıynsha sharalardy qabyldaýdy tapsyramyn. Óńirlik damý mınıstri baǵdarlamanyń júzege asyrylýyna barynsha qatań baqylaý men monıtorıngti qamtamasyz etip, óńir ákimderimen birlesip, 2014 jylǵa arnalǵan turǵyn úı kólemin paıdalanýǵa berý boıynsha memorandýmdar jasasýy qajet», - dedi S.Ahmetov.
Úkimet basshysynyń paıymynsha, «Qoljetimdi baspana-2020» baǵdarlamasyn júzege asyrý jaqsy mýltıplıkatıvti tıimdilik beredi jáne el ekonomıkasynyń basqa da salalarynyń, onyń ishinde qurylys ındýstrııasynyń damýyna serpin qosatyn bolady.
Sondaı-aq ol Qazaqstanda ótken jyly 7 turǵyn úı qurylysy kombınaty turǵyzylǵanyn atap óte kele: «Aǵymdaǵy jyly taǵy 8-i salynady. Barlyǵynda da jańa tehnologııalar men zamanaýı qurylǵylar. Sondyqtan da atalǵan kásiporyndardy tolyǵymen júkteý mańyzdy mindet. Ákimderge Óńirlik damý mınıstrligimen birlesip, barlyq zaýyttardy 2-3 jyl alǵa júkteýdi tapsyramyn»,- dedi.