Barlyq aımaqta janarmaı qory úzdiksiz tolyqtyrylyp otyr - Energetıka mınıstrligi

<p>ASTANA. KAZINFORM - Aımaqtardy, onyń ishinde Batys Qazaqstan oblysyn, munaı ónimderimen qamtamasyz etý QR Energetıka mınıstrliginiń turaqty baqylaýynda. Shymkent jáne Pavlodar munaı óńdeý zaýyttary 100% qýattylyqta jumys istep, janarmaı qory úzdiksiz tolyqtyrylyp otyr.</p>

«AI-92 avtokóligine arnalǵan benzın aımaqqa temirjol vagondarymen jetkizilip, keıinnen jergilikti munaı bazalaryna túsirilip, sodan keıin avtotsısternalarmen janarmaı quıý stantsııalaryna (AZS) tasymaldanady.

Atyraý MÓZ-indegi josparly jóndeý jumystary aıaqtalýǵa jaqyn, bul da jetkizilim turaqtylyǵyn qamtamasyz etedi», — dep málimdedi Energetıka mınıstrligi.

16 qazan kúngi jaǵdaı boıynsha BQO-daǵy janarmaı qory:

• AI-92 — 3,82 myń tonna, bul oblystyń 14 kúndik qajettiligin jabady;
• AI-95 — 0,72 myń tonna, bul 11 kúndik qajettilikti jabady.

«Óńirdegi „PetroRetail“, „Helios“ jáne „Sinooil“ sııaqty iri AZS jelileri tolyq kólemde janarmaımen qamtamasyz etilgen. „Neftek“, „Venoil“ jáne „Mega Oıl“ sııaqty óńirlik jeliler de qajetti qorlarmen qamtamasyz etilgen», — delingen aqparatta.

Mınıstrlik benzındi zańsyz shekteý nemese onyń munaı bazalarynan AZS-ke jetkizilýinde kidiris bolǵan jaǵdaıda BQO ákimdigi janyndaǵy janarmaı boıynsha aımaqtyq shtabqa júginýdi usynady.

Shtab quramyna jergilikti básekelestikti qorǵaý, qarjylyq monıtorıng, memlekettik kirister jáne tabıǵı monopolııalardy retteý departamentteriniń ókilderi kiredi.