«Barystyń» baby kelisip, baǵy jana ma
Jańa bapkerdiń qabiletin baıqaımyz...
Sońǵy eki maýsymda komanda tizginin belarýstik Andreı Skabelka ustaǵan edi. Tájirıbeli bapkerdiń jetekshiligimen 2018-2020 jyldarda elordalyq klýb táp-táýir nátıjege qol jetkizdi. Shyǵys konferentsııasynda ekinshi orynǵa taban tirep, pleı-off satysynyń ekinshi kezeńinde synǵa túsýge múmkindik aldy. Degenmen 2020 jyly ol reseılik «Lokomotıv» (ıAroslavl) komandasynyń tizginin ustady. Alaıda 2022 jyly komandaǵa qaıta oraldy. Bul joly komanda joǵary kórsetkishke qol jetkize alǵan joq. Nátıjesinde 2023 jyly ol «Baryspen» kelisim-shartty erte úzýine týra keldi. Odan keıin kelgen Ǵalym Mámbetálıev te, Oleg Bolıakın de elordalyq komandanyń jaqsy oınap ketýine múmkindik jasaı alǵan joq.
Jańa maýsymǵa daıyndyq aldynda komanda basshylyǵy atalǵan qyzmetke kanadalyq Devıd Nemırovskıdi shaqyrdy. 1993-2014 jyldar aralyǵynda hokkeıshi retinde oıyn kórsetken ol 2018 jyldan beri bapkerlik qyzmet atqaryp keledi. Aldymen Reseıdiń «Torpedo» (Nıjnıı Novgorod) klýbynda eńbek etken maman tórt jyl boıy komandaǵa tálimgerdik jasady. 2023 jyldyń sáýirinde Reseıdiń «Sıbır» (Novosibir) klýbynda bas bapker qyzmetine taǵaıyndalǵan maman sol jyldyń 6 jeltoqsanynda ornyn bosatty.
«Devıd Nemırovskı bapkerlik qyzmette nebári alty jyl ǵana jumys jasaǵan. Ázirge eshqandaı komandamen joǵary nátıjege qol jetkize qoıǵan joq. Sondyqtan ol jaıynda ázirge naqty sheshim aıta qoıý qıynǵa túsedi. Dese de ol bapkerlik qyzmetinde joǵary tabystarǵa qol jetkizýdi qalaıtyny anyq. Sondyqtan elordalyq klýbtyń aldaǵy oıyndarynda onyń qoltańbasyn tanıtyn bolamyz», - deıdi sport jýrnalısi Teljan Kúderov.
Qandaı oıynshylar keldi?
Qazaqstandyq komanda jańa bas bapkeriniń jetekshiligimen maýsym aldynda eki týrnırde baq synady. Aldymen elordada Prezıdent kýbogy týrnırinde úshinshi orynǵa jaıǵassa, Reseıdiń Omby qalasynda bolǵan Blınov týrnırinde sońǵy oryndy mise tutty. Dese de onda komanda quramynda kóptegen oıynshylar bolǵan joq. Olardyń barlyǵy Qazaqstan olımpıadalyq quramasynyń daıyndyǵyna baılanysty «Barys» quramynda saıysqa túse almady. Sol sebepti ázirge «Barystyń» oıyn jaǵdaıy jóninde pikir aıtýǵa ázirge erterek sekildi.
Bıyl komanda quramyna kimder keldi? Aldymen sol jóninde oı bólise ketelik. Bas bapkerdiń suraýymen «Barysty» amerıkalyq, kanadalyq jáne reseılik hokkeıshiler tolyqtyrdy. Olardyń qatarynda shvetsııalyq qaqpashy ıÝhan Mattsson, qorǵanysta Natan Bole, amerıkalyq Ýıll Batcher, reseılik Nıkıta Kamalov, Vıktor Antıpın, shabýyl shebinde kanadalyq Ýeıd Ellıson, Konnor Smıt pen Maıkl Maklaýd, belarýstik Vladıslav Kodola, reseılik Damır Jafıarov, Anton Býrdasov jáne basqa da hokkeıshiler bar. Árıne, bul hokkeıshiler Ulttyq hokkeı lıgasy, Qurlyqtyq hokkeı lıgasynda sheberligin jetildirgen. Sondyqtan komandanyń aldaǵy jetistigine úlken úles qosady degen úmit bar.
Oń nátıjege qol jetkize alamyz ba?
Dese de komanda quramynan ulttyq quramanyń negizgi qaqpashysy Andreı Shýtov, kanadalyq qaqpashy Eddı Paskýale jáne byltyr oınaǵan sheteldik hokkeıshiler ketti. Árıne, byltyr jankúıerler kanadalyq qaqpashynyń oıynyna kóńili tolǵan joq. Mańyzdy matchtyń kóbisinde óreskel qatelikterge boı aldyrdy. Saldarynan «Barys» qarsylas ujymdarǵa ese jiberip, týrnır kestesinde tómengi orynnyń birin mise tutty.
«Bıyl komanda quramy jaqsy jasaqtaldy dep oılaımyn. Árıne, qaı kezde de jankúıerdiń qoldaýynsyz komanda joǵary jetistikke qol jetkizý qıyn. Árbir ujym óz aıdynyndaǵy oıyndarynda olardyń qoldaýyn kútedi. Nátıjesinde oıynshylar jaqsy sheberligimen kózge túsýge tyrysady. Sondyqtan jankúıer qoldaýynyń arqasynda oń nátıjege qol jetkizemiz degen oıdamyn. Men kezinde bul komandada oıyn kórsettim. Maǵan árqashan mundaı klýbtardy basqarý qyzyqty kórinedi. Komandada jyl saıyn jergilikti hokkeı túlekteri jaqsy qyrynan kózge kórinip keledi. Olardyń arasynda keıbiri basqa klýbtardy oıyn kórsetedi. Árıne, qarsylas ujymdardyń barlyǵy quramyn kúsheıtti. Barlyǵyn maýsym barysynda kóremiz», - dedi komandanyń bas bapkeri.
Endi Qurlyqtyq hokkeı lıgasyndaǵy komandalar 2024 jyldyń 3 qyrkúıegi men 2025 jyldyń 31 mamyry aralyǵynda saıysqa túsedi. Jyldaǵy dástúrmen turaqty kezeńde alǵashqy 16 orynǵa ıe bolǵan ujymdar Gagarın kýbogynda saıysqa túsýge múmkindik alady.
Eske salsaq, búgin Qurlyqtyq hokkeı lıgasyndaǵy alǵashqy oıynyn Reseıdiń «Neftehımık» komandasyna qarsy ótkizedi.