«Barys» jetinshi márte jeńilistiń aşy dámin tatty

<p>ASTANA. KAZINFORM — Qazaqstandyq «Barys» komandasy búgin Qurlyqtyq hokkeı lıgasyndaǵy kezekti oıynyn elordada Reseıdiń «Dınamo» (Máskeý) komandasyna qarsy ótkizdi.</p>

Elordalyq klýb jańa maýsymdy sátsiz bastady. Jeti kezdesýdiń altaýynda qarsylastaryna ese jiberip qoıdy. Saldarynan týrnır kestesinde eń sońǵy oryndy mise tutyp tur.

Foto: Vıktor Fedıýnın/ Kazinform

Jańa maýsym aldynda bas bapker qyzmetine taǵaıyndalǵan Devıd Nemırovskı komandany jeńiske jeteleı alǵan joq. Saldarynan komanda basshylyǵy ony qyzmetinen shettetti. 

Búgingi oıynda bas bapker mindetin Evgenıı Korolev atqardy. 

Foto: Vıktor Fedıýnın/ Kazinform

Dese de bul joly da «Barys» jankúıerler seniminen shyǵa alǵan joq. Oıynnyń 5-mınýtynda reseılik klýbtan Nıkıta Gýsev esep ashsa, Djordan Ýıl 26-mınýtta basymdyqty arttyrdy.

Al elordalyq komandadan 28-mınýtta Álıhan Ómirbekov esep aıyrmasyn qysqartsa, Nıkıta Gýsev 43-mınýtta taǵy bir márte kózge tústi. 

Osylaısha «Barys» qarsylasyna 1:3 esebimen ese jiberip, sátsizdik serııasyn jalǵastyrdy.

Foto: Vıktor Fedıýnın/ Kazinform

Endi qazaqstandyq komanda budan keıingi úsh oıynyn elordada ótkizedi.

Aldymen 26 qyrkúıekte Reseıdiń «Sochı» klýbymen oınasa, odan keıin 28 qyrkúıekte «Vıtıaz» (Podolsk), 30 qyrkúıekte «Torpedo» (Nıjnıı Novgorod) komandalarymen kezdesedi.

Foto: Vıktor Fedıýnın/ Kazinform