«Barys» babyna qashan keledi
Barlyǵy bapkerge de baılanysty
1999 jyly tusaýyn kesken komanda 2008 jyldan beri Qurlyqtyq hokkeı lıgasynda oıyn kórsetip keledi. On alty jyldan astam ýaqyttan beri qazaqstandyq jankúıerlerdi talaı márte jeńisimen jelpindirgenin áli kúnge deıin umyta qoıǵan joqpyz. Sondyqtan «Barystyń» árbir sátsizdigi hokkeıdi qyzyǵa tamashalaıtyn jergilikti jurtshylyqqa aýyr tıedi.
Ras, komandanyń qurylýdaǵy negizgi maqsaty — sapaly sheteldik oıynshylardy tarta otyryp, qazaqstandyq jastardy tárbıelep shyǵarý ekeni belgili. Alǵashqy jyldarda Brendon Bochenskı, Naıdjel Doýs, Kevın Dellmen sekildi sheteldik hokkeıshiler «Barystyń» joǵary bıikten kórinýine úlken qosty.
Odan keıingi jyldarda Darren Dıts, Djessı Bleker, Fılıpp Varone, Lınden Veı, Kertıs Volk, Entonı Kamara, ıAkob Lılıa syndy tájirıbeli oıynshylar elordalyq klýb sapynda oıyn kórsetti. Olardyń árbir is-qımyly, mergendigi, sheberligi jankúıerler kóz aldynda áli kúnge deıin tur.
Sol bir jyldarda «Barystyń» bas bapkeri qyzmetine tájirıbeli mamandar shaqyryldy. Olardyń qatarynda sheteldik jáne qazaqstandyq azamattar bar.
Atap aıtqanda, bul tizimge reseılik Vladımır Krıkýnov, fınlıandııalyq Arı-Pekka Selın, belarýstik Andreı Skabelka, qazaqstandyq ıÝrıı Mıhaılıs syndy bapkerlerdi qosýǵa bolady.
Óz tarıhynda «Barys» tórt márte Qurlyqtyq hokkeı lıgasynyń pleı-off satysyna shyǵa alǵan joq. Ókinishisi, onyń ishinde keıingi eki jylda osyndaı sátsizdik qaıtalanyp otyr.
Bul oraıda eń aldymen negizgi máseleni komanda basshylyǵynan izdeýge bolady. 2018 jyldan beri «Barys» komandasy prezıdenti qyzmetin Borıs Ivanışev atqaryp keledi.
Sondaı-aq bas menedjer mindeti Oleg Bolıakınge júktelgen. Endigi kezekte osy jyldar aralyǵynda komandanyń bas bapkeri qyzmetin segiz maman atqarǵanyn aıta keteıik. Oǵan qosa hokkeıshilerdiń de jylda aýysyp ketip jatqanyn esten shyǵarýǵa bolmaıdy.
— Komanda sapynda QHL deńgeıine saı emes legıonerler kóp. Ony bas bapkerdiń ózi aıtyp otyr. Jaqynda ǵana qurlyqtyń ar jaǵynan Cheıs DeLeo degen hokkeıshini ákeldi. Endi maqtaýyn keltirdi. Statıstıkalyq málimetterin jaıyp saldy. Úsh jyl bir komandada kapıtan jáne lıder bolǵanyn da jazdy. Biraq, bul shabýylshy da «Barysqa» kómektese almaı júr. Kerek deseńiz, ol tipti ortalyq shabýylshy emes eken. Bul rette klýbtyń qazirgi bas bapkeri Vıacheslav Býtsaevtyń ózi aıtty. «Barys» besaspap ortalyq shabýylshyǵa zárý. Shaıba-talapaıda komandaǵa shaıbany alyp berer ortalyq shabýylshy joqqa tán. Osy jaǵynan ylǵı esesi ketip júredi, — deıdi hokkeı taqyrybynda jıi jazyp júrgen sport jýrnalısi Nurǵazy Sasaev.
Kásibı deńgeıi kúmán keltiredi
Endeshe, mundaı sapasyz legıonerdi alyp kelýge kim múmkindik berip otyr? Olardyń alatyn jalaqysy da qarapaıym adamdar úshin tańǵalarlyq. Bul jóninde Sport Express basylymynda jarııalanǵan derekterge kóz salyp kórelik.
Bıyl komanda quramyna qosylǵan kanadalyq Maıkl Maklaýd tabysyn jylyna 336,59 mln teńgege jetkizedi. Al reseılik Damır Jafıarov, kanadalyq Natan Bole, Ýeıd Ellıson, AQSh-tan kelgen Sı Djeı Smıt, shvetsııalyq ıÝhan Mattsson jylyna 61-280 mln teńge aralyǵynda eńbekaqy alady.
— Osynyń ózi qyrýar aqsha emes pe? Qazyna qazanynan bólingen qarjynyń óteýi bar ma? Ázirge eshqandaı nátıje joq. Bar kináni qyzmetinen ketken bas bapker Devıd Nemırovskıge ysyryp qoıamyz ba? Bálkim, keıingi eki jyldaǵy sátsizdik úshin komanda basshylyǵyn da aýystyrýymyz kerek shyǵar, — deıdi taǵy bir sport jýrnalısi Teljan Kúderov.
Bıyl kelgen hokkeıshilerdiń sheberlik deńgeıi tómen ekenin qazirgi bas bapker Vıacheslav Býtsaev ta jasyrǵan joq. Sońǵy Reseıdiń «Torpedo» komandasynan jeńilisten (1:10) keıin keıbir oıynshylardyń kásibı deńgeıine syn aıtty.
— Aıta ketsek, «Torpedomen» kezdesýde kóp oıynshylarǵa kóńil tolǵan joq. Birqatar hokkeıshiler jankúıer qoldaýyna ıe boldy. Sondyqtan olardyń kóbisine aıtylatyn syn bar. Qurlyqtyq hokkeı lıgasy deńgeıinde oınaı alatyn kásibıligin kórsete alǵan joq. Sol sebepti olarǵa qatysty kóp saýal qoıylady, — dedi ol.
Bapkerden artyq eshteńe aıta almaspyz. Jalpy, bıylǵy selektsııa máselesiniń syn kótermeı turǵany oılantady. Bul komanda basshylyǵy tarapynan júıeli jumys júrgizilmegenin aıǵaqtaıdy.
Sheteldik hokkeıshilerdiń deńgeıi qandaı?
Ashyǵyn aıtsaq, «Barys» bıyl kóptegen hokkeıshilermen kelisimshartty uzartqan joq. Keıbiri óz erkimen basqa komandaǵa aýysyp ketti.
Dese de komanda quramynan ulttyq quramanyń negizgi qaqpashysy Andreı Shýtov, kanadalyq qaqpashy Eddı Paskýale, chehııalyq Davıd Sklenıchka, Rýdolf Cherveny, kanadalyq Entonı Kamara, amerıkalyq Djozef Labeıt, shvetsııalyq Pontýs Oberg syndy hokkeıshiler komanda quramynan ketti.
Olardyń óziniń sheberlik deńgeıi bıylǵy oıynshylardan joǵary edi.
«Meniń oıymsha, endigi kezekte oıynshylar selektsııasyna mán berilýi tıis. Komandaǵa kelýge usynylǵan hokkeıshilerdiń budan burynǵy nátıjesine kóńil bólgenimiz artyq emes. Bıylǵy kelgender jergilikti túlekterden artyq oınaı almaıtyny kezdesý barysynda ańǵarylyp júr. Endeshe, mundaı jónsizdikke jol bermegenimiz durys», — deıdi jankúıer Qaırat Najmatov.
Árıne, byltyr jankúıerlerdiń kanadalyq qaqpashynyń oıynyna kóńili tolǵan joq. Mańyzdy matchtyń kóbisinde óreskel qatelikterge boı aldyrdy. Saldarynan «Barys» qarsylas ujymdarǵa ese jiberip, týrnır kestesinde tómengi orynnyń birin mise tutty.
Endi Qurlyqtyq hokkeı lıgasyndaǵy komandalar 2024 jyldyń 3 qyrkúıegi men 2025 jyldyń 31 mamyry aralyǵynda saıysqa túsedi.
Jyldaǵy dástúrmen turaqty kezeńde alǵashqy 16 orynǵa ıe bolǵan ujymdar Gagarın kýbogynda saıysqa túsýge múmkindik alady.