Bárimiz bir-birimiz úshin jaýaptymyz – Volonter karantın týraly

NUR-SULTAN. QazAqparat – Qoǵam belsendisi, «Volonterler lıgasy» qoǵamdyq qorynyń tóraǵasy Aısulý Ernııazova karantındi qatańdatý sharalary týraly pikir bildirdi, dep habarlaıdy QazAqparat tilshisi.

«Taǵy da jaýyr bolǵan taqyrypqa oralaıyq. Prezıdent karantındi qatańdatý sharalaryn ázirleýdi tapsyrdy. Óıtkeni, elimizde tótenshe jaǵdaı men karantın túsinikteriniń aıyrmashylyǵyn, birin alǵanymen, ekinshisi qalǵanyn túsingender az boldy. Árıne, barlyǵy sharshady, muny jaqsy túsinemin. Keı adamdar birden qydyrýdy bastady. Adamdar jappaı kóz juma bastaǵan soń ǵana esimizdi jıǵandaı boldyq», - dep jazdy qoǵam belsendisi Instagram jelisinde.

Spıker ákimderge jasalǵan sógis pen eskertýdiń barshamyzǵa qatysty ekenin aıtty.

«Qasym-Jomart Kemeluly ákimderge eskertý men sógis jarııalady, óıtkeni olar – halyq úshin jaýapty tulǵalar. Biraq bul – barshamyzǵa arnalǵan eskertý. Sonymen birge bizge jasalǵan qamqorlyq! Sondyqtan da, shekteýlerdi kúsheıtý sharalaryna túsinistikpen qaraǵan jón. Bul – bizdiń óz densaýlyǵymyzǵa jáne aınalamyzdaǵy adamdarǵa salǵyrt qaramaýymyz úshin qajetti sharalar. Barlyq máselelerdiń sheshimi bar, eń bastysy #Birgemiz jáne osylaı ǵana jeńiske jetemiz. Bárimiz bir-birimiz úshin jaýaptymyz», - deıdi Aısulý Ernııazova.

Eske sala keteıik, keshe QR Premer-Mınıstri Asqar Mamınniń tóraǵalyǵymen ótken Memlekettik komıssııa otyrysynda Qazaqstanda epıdemıologııalyq ahýaldyń órshýin jáne koronavırýs ınfektsııasymen syrqattanýdyń ósýin eskere otyryp, bıylǵy 5 shildeden bastap 14 kúnge birqatar shekteý sharalaryn engizý týraly sheshim qabyldanǵan edi.