Bári de zańdy jolmen rettelýi kerek – zańger

ORAL. QazAqparat – Bári de zańdy jolmen rettelýi kerek. Bul týraly Oralda beıbit jıyndar týraly zań jobasyn talqylaýǵa qatysqan Qazaqstan ınnovatsııalyq jáne telekommýnıkatsııalyq júıeler ýnıversıteti JOO-dan keıingi bilim berý bóliminiń jetekshisi, zań ǵylymdarynyń kandıdaty, dotsent Talǵat Rahmetov málim etti, dep habarlaıdy QazAqparat tilshisi.

Onyń aıtýynsha, atalmysh zań jobasy halyq arasynda keńinen talqyǵa túsip, usynys-pikirlerdiń eskerilgeni mańyzdy.

Burynǵy zańǵa qaraǵanda, «Qazaqstan Respýblıkasynda beıbit jıyndar, sherý, pıketter, demonstratsııalyq jınalystardy ótkizý men uıymdastyrý tártibi týraly» zań jobasy azamattardyń óz quqyqtaryn molynan paıdalanýǵa múmkindik beredi.

«Zań jobasynda demokratııa kópten ornyqqan shet elderdiń tájirıbesi eskerilgen. Osy oraıda meniń aıtarym, beıbit jıyndy uıymdastyrýshylar óz jaýapkershiligin umytpaýy tıis. Mysaly, keıbir elderde mıtıngiler beıbit bastalyp, sońy úılerdi qıratyp, avtokólikterdi órteýge ulasyp jatady. Mundaıǵa jol berýge bolmaıdy. Eń bastysy, zań birinshi orynda turýy kerek. Men, tutastaı alǵanda, zań jobasyn qoldaımyn», dedi Talǵat Rahmetov.