Bar maqsatym – Parıjde kók týymyzdy jelbiretý – Qamshybek Qońqabaev

<p>ASTANA. KAZINFORM &ndash; Tórtjyldyqtyń basty básekesi Parıj Olımpıadasy kún sanap jaqyndap keledi. Buǵan deıin dúbirli dodaǵa joldama jeńip alǵan sportshylar daıyndyǵyn pysyqtap, qyzý jattyǵý jasasa, joldamaǵa qol jetkize almaǵandar irikteý týrnırlerine daıyndalyp jatyr.&nbsp;</p>

Qazaq boksshylary arasynda erler quramasynan Parıj Olımpıadasyna alǵashqy joldamany +92 keli salmaqta óner kórsetetin Qamshybek Qońqabaev qana jeńip alǵan bolatyn. Ol bul múmkindikke ótken jyly Qytaıdyń Hanchjoý qalasynda ótken Azııa oıyndarynda qol jetkizdi.

Qamshybek Olımpıada oıyndarynda ekinshi márte el namysyn qorǵaıdy. Ol birinshi ret Tokıo Olımpıadasyna qatysyp, qola medal jeńip alǵan edi.

Endi Qońqabaevtyń osy ýaqytqa deıin qandaı jetistikterge qol jetkizgenine qysqasha sholý jasap kóreıik.

Asa aýyr salmaqta el namysyn synap júrgen sańlaǵymyz 1991 jyly 18 qarasha kúni Qyzylordada dúnıege kelgen.

Jetistikteri:

Tokıo Olımpıadasynyń qola júldegeri

Álem chempıonatynyń 2 márte kúmis júldegeri (2017, 2019)

Jazǵy Azııa oıyndarynyń kúmis júldegeri (2022)

Azııa chempıonatynyń 4 márte kúmis júldegeri

Qamshybek Qońqabaev — +92 keli salmaqta 2 márte Olımpıadada baq synaıtyn úshinshi qazaqstandyq boksshy. 

Tájirıbeli sportshyny 2006 jyldan beri Seıitjan Tókenov jattyqtyrady. Qamshybektiń jeke bapkeri shákirtin áli kúnge syndarly saıystarda shyńdap, jarystarǵa baptap júr.

«Men aldaǵy lıtsenzııalyq týrnırlerge barmasam da, Ulttyq qurmadaǵy boksshylarmen birge daıyndalyp, birge jattyǵyp, birikken oqý-jıyndarynda júrmin. Mende qazir jalǵyz ǵana maqsat bar – ol Parıj Olımpıadasynda el namysyn abyroımen qorǵap, kók týymyzdy jelbiretý. Sol úshin kúndiz-túni tynbaı jattyǵyp, dúbirli dodaǵa jaqsy daıyndyqpen barýym kerek. Buıyrsa, júlde alamyn dep oılaımyn», - deıdi boksshy.

Shákirti týraly Qazaqstan ulttyq quramasynyń bas bapkeri Myrzaǵalı Aıtjanov ta pikir bildirip, Qońqabaevqa úmit artyp otyrǵanyn jasyrmady.

«Ol - Tokıoda Olımpıadanyń qola medalin jeńip alǵan boksshy. Birinshi Olımpıadasy emes. Tájirıbeli saqa sportshylarymyzdyń biri. Endi, mine ekinshi Olımpıadasyna barýǵa «bıleti» daıyn, qolynda tur. Tórt jyl burynǵy jetistigin jaqsartyp, Parıjde altyn alýdy kózdep otyr. Oǵan sportshynyń áleýeti jetedi», - dedi M.Aıtjanov.