«Baqytty Vala» baıqaýy: Dımash Qudaıbergenniń fanattary qatysýshylarǵa arnaıy syı ázirledi

AQTÓBE. QazAqparat – Aqtóbede «Baqytty Vala» balalar vokaldyq festıval-baıqaýy ótip jatyr. Baıqaý uıymdastyrýshylarynan bólek Dımash Qudaıbergenniń fanattary qatysýshylarǵa arnap syı ázirlep jatyr, dep habarlaıdy QazAqparat tilshisi.

«Baqytty Vala» baıqaýy bıyl besinshi ret uıymdastyrylyp jatyr. Oǵan álemniń 5 elinen kelgen 10-16 jas aralyǵyndaǵy 20 jasóspirim irikteldi. Bir ereksheligi - Dımash Qudaıbergenniń fanattary qatysýshylardy bólek marapattaıdy.

«Baqytty Vala» - ádemi festıval. Ýaqyt zý etip óte shyqty. Bıyl besinshi ret uıymdastyryldy. Qýanarlyǵy – álemniń túkpir-túkpirinde qatysýǵa nıet bildirgen balalar sany artyp keledi. Bıyl da 250-den astam ótinish tústi. Olardyń arasynan irikteý júrgizildi. Barlyǵy 20 balany táýilsiz sarapshy tańdady. Bári de talantty, janyp tur. Bizdiń maqsat – balalardy dostastyrý, ár elden kelgen balalardyń óner, bilim kókjıegin keńeıtý. Bul joly ákimdik belgilegen syılyqtan ózge Dımashtyń tyńdarmandary da syı ázirledi. «Kórermen kózaıymy» sekildi birneshe nomınatsııa tabystalady. Qazylar alqasy men kórermen usynysy eskeriledi»,- dedi ádilqazylar alqasynyń múshesi Qanat Aıtbaev. Onyń aıtýynsha, elimizdiń ónerli balalary Dımash Qudaıbergenniń nazarynan tys qalmaıdy. Ol únemi baqylap, unaǵanyn otbasymen bólisip otyrady.

«Dımash ózi kontsertterine shaqyryp, sahnaǵa alyp shyqqandy jaqsy kóredi. Balalardyń jetistikterin baqylap, shetelde óner kórsetkenderine qýanyp otyrady. Meıli ol bul baıqaýǵa qatyspasa da. Vıdeosyn kórsetedi. Jaqsy óner kórsetken balalardyń barlyǵy da bizdiń kóz qyrymyzda bolady»,- dedi Qanat Aıtbaev.

Bıyl irikteý kezeńine Ispanııa, Ulybrıtanııa, Máskeý, Ýkraına, Ózbekstan, Qyrǵyzstan, Ázirbaıjan, Tatarstan, Mavrıkıı, Moldova, Koreıa, Bolgarııa, Germanııa, Nıderland elderinen jáne Qazaqstannyń barlyq qalasy men oblysynan ótinimder qabyldandy. Qazylar alqasynyń tóraǵasy Dımash Qudaıbergenniń ustazy – Marat Áıtimov. Sonymen birge Qanat Aıtbaev, Ózbekstannan Nadejda Golender, Astanadan Rasýl Ýsmanov, Rýhııa Baıdúkenova bar.

«Men Dımash Qudaıbergenniń fanatymyn. Osy baıqaýǵa arnaıy keldim. Men súıikti ánshimniń týǵan jerin, baıqaýdy kórgim kelip edi. Bıyl sáti tústi. Buǵan deıin Almatydaǵy kontsertinde boldym. Sol kezde Qazaqstanǵa alǵash kelgen edim. Jalpy ózim álemniń qaı túkpirinde bolsa da Dımashtyń kontsertine baratyn adammyn. Al týǵan jeri bizge de ystyq»,- dedi Dımashtyń jankúıeri Ksenııa Zabolotnıkova.