Bapker men basseın jetispeýshiligi: Almatyda mánerlep júzý sportynyń problemalary talqylandy
Ártistik júzý federatsııasynyń Almaty qalasy boıynsha prezıdenti Álııa Zakarııa mánerlep júzý sportyn damytý úshin qajetti ınfraqurylymnyń joq ekenin aıtty. Onyń sózinshe, qaladaǵy basseınderdiń kópshiligi kásibı sporttyń standarttaryna sáıkes kelmeıdi. Al sáıkes keletinderi kommertsııalyq paıda úshin qoldanylady.
- Tek bizde ǵana emes, barlyq sport túrlerindegi basty másele – qajetti ınfraqurylymnyń bolmaýy. Mánerlep júzý úshin tereńdigi kem degende 3,5 metr bolatyn basseınder qajet. Ókinishke qaraı, elimizde halyqaralyq standartqa sáıkes keletin, álemdik dárejedegi jarystardy ótkizýge bolatyn birde bir basseın joq. Bizdiń zertteýimiz boıynsha Almatyda 57 basseın bar, onyń 6-ýy ǵana álemdik jattyǵý standarttaryna sáıkes jáne tek 3-eýi ǵana jarystar ótkizýge laıyq. Biraq onyń ózinde týyndaıtyn másele bar – bul basseınderdiń kópshiligi keńestik kezeńde jeke ıelikke ótip ketken. Sondyqtan aıtylǵan obektilerdiń basym bóligi fıntes salasyna qoldanylady. Al biz jattyǵý kezinde mýzyka qosamyz, ártúrli is-qımyldar bolady, ol ózge adamdarǵa yńǵaısyzdyq týdyrýy múmkin. Osy sebepti bizde barlyq jerde jyly shyraımen qabyldaı bermeıdi. Munyń ózi biz úshin úlken másele, – dedi ol.
Sondaı-aq Álııa Zakarııa mánerler júzý «Damý bala» baǵdarlamasyna kirmeıtindikten, onyń balalar arasynda jappaı taraýyna múmkindik bolmaı turǵanyn atap ótti.
Al ártistik júzý federatsııasynyń Almaty qalasy boıynsha vıtse-prezıdenti Ásel Orynbasarova mánerlep júzý boıynsha bilikti tóreshilerdiń az ekenin aıtty. Onyń aıtýynsha, qazirgi ýaqytta Azııa óńirde tóreshilerdi daıyndaıtyn myqty hab joq jáne bul múmkindikti Qazaqstan paıdalanýy qajet.
- Qazaqstanda tóreshilerdiń daıyndaýdyń tıimdi júıesi joq. Mánerlep júzýde tóreshilerdiń jetispeýshiligi tipti qatty bilinedi. Keı jarystarda bapkerlerdiń ózderine tóreshilik etýge týra keledi. Biraq mundaı jarystarda ádil baǵa berile bermeıdi. Jalpy aıtqanda tóreshilerdi kásibı túrde daıyndaıtyn ortaq baǵdarlama joq. Biz qolymyzdan kelgenshe oqytý kýrstaryn, biliktilikti arttyrý kýrstaryn ótkizip jatyrmyz. Qazir tóreshilik boıynsha álemde AQSh pen Eýropa elderiniń basymdylyǵy baıqalady. Jaqynda ártistik júzýden Azııa óńiriniń basshysy osy óńirden shyqqan tóreshilerdiń az ekenine alańdaýshylyq bildirdi. Eger biz halyqaralyq jarystarda teń dárejede qatysyp, joǵary oryndardan kóringimiz kelse, bizge bilikti tóreshiler toby kerek. Azııada tóreshilerdi daıyndaıtyn ortalyq joq, biz sondaı habqa aınala alamyz. Sondyqtan bul máselege memleket tarapynan kóńil bólingeni durys, – dedi Ásel Orynbasarova.
Baspasóz máslıhatynyń sońynda Almaty qalasy boıynsha mánerlep júzýden aǵa jattyqtyrýshy Áıgerim Isaeva sportshylardy daıyndaıtyn bapkerlerdiń jetispeýshiligine toqtaldy. Jattyqtyrýshynyń aıtýynsha, osy salada sporttyq mansabyn aıaqtaǵan sportshylar bapkerlikke barmaıdy. Onyń sebebi – jalaqynyń az bolýy. Áıgerim Isaeva bapker bola alatyn sportshylar kóbine jalaqysy joǵary fıtnes ortalyqtarda jumys isteýdi tańdaıtynyn atap ótti.
Aıta keteıik, elimizdegi mánerlep júzý sportynyń negizi 1984 jyly qalanǵan. Osy jyly Almaty qalasynyń №20 BJSM dırektory Garı Kornoýhov Ýkraınadan jattyqtyrýshylar juby – Lıdııa Podgýrskaıa men Vladımır Kýznetsovty jumysqa shaqyrǵan. Olarǵa Qazaqstanda mánerlep júzýden komanda qurý úshin 4 jyl jumys qajet boldy. Al 1988 jyly KSRO chempıonatynda Qazaqstan komandasy alǵash ret óz baǵdarlamasyn kórsetti. Chempıonattan keıin Qazaqstan quramasynyń tórt sportshysy rezervke alynsa, al egiz Bashkaevtar KSRO quramasynyń negizgi quramyna kirdi.