Bankti aldaǵan Reseı azamaty Nur-Sultanda ustaldy
«Elordanyń polıtsııa qyzmetkerleri Nur-Sultan qalasynda jedel izdestirý sharalaryn júrgizý barysynda Ingýshetııa Respýblıkasy aýmaǵynda qylmys jasaǵany úshin halyqaralyq izdeýde júrgen Reseı Federatsııasynyń azamatyn ustady», - delingen qalalyq Polıtsııa departamentiniń aqparatynda.
Vedomstvo málimetinshe, 63 jastaǵy kúdikti Ingýsh bank bólimshesine jalǵan málimetter usyný arqyly 10 mln rýbl mólsherinde nesıe alǵannan keıin el aýmaǵynan boı tasalaǵan. Osydan keıin atalǵan iske baılanysty Ingýshetııa Respýblıkasynyń Іshki ister mınıstrligi alaıaqtyq faktisimen qylmystyq is qozǵaǵan.
«Qazirgi ýaqytta ustalǵan adam otanyna ekstradıtsııalaný úshin Nur-Sultan qalalyq Polıtsııa departamentiniń ýaqytsha oqshaýlaǵyshyna qamaldy», - dep atap ótedi polıtsııadan.