Bankterge reseılik «MIR» kartalary arqyly operatsııa jasaýǵa ruqsat etildi - Agenttik

ASTANA. QazAqparat – Qazaqstandaǵy bankterge «MIR» kartalary boıynsha tólemderdi, aýdarymdardy qabyldaýǵa ruqsat etildi, dep habarlaıdy QazAqparat Qarjy naryǵyn retteý jáne damytý agenttigine silteme jasap.

«8 jeltoqsanda AQSh Qarjy mınıstrliginiń bólimshesi — Sheteldik aktıvterdi baqylaý basqarmasynan (OFAC) hat aldy. Onda amerıkandyq vedomstvo «MIR» júıesiniń bank kartalaryn jeke tulǵalardyń, atap aıtqanda Reseıden Qazaqstanǵa qonys aýdarǵan azamattardyń kúndelikti ómir súrýin qamtamasyz etetin operatsııalar jasaý úshin paıdalanýyna qarsylyq bildirmeıtinin túsindirdi. Bul rette, hatta osy tólem júıesimen jasalatyn operatsııalar Reseıge qarsy sanktsııalardy aınalyp ótý úshin ony paıdalanýǵa jol bermeý maqsatynda erekshe baqylaýda qalatyny atap ótilgen», - delingen Agenttik habarlaamsynda.

Qazaqstandyq bankter «MIR» kartalary boıynsha tólemderdi, aýdarymdardy qabyldaýǵa, sondaı-aq jeke tulǵalar úshin bankomattar arqyly qolma-qol aqsha berýdi júzege asyrýǵa quqyly.

Bul rette, «MIR» júıesine qosylý týraly sheshimdi qazaqstandyq bankter ózderiniń damý strategııalary men táýekelderdi baǵalaýdyń ishki júıeleri negizinde derbes qabyldaıdy.

Foto: banki.ru