Bankterge merzimi ótken zaımdardy kollektorlyq kompanııalarǵa berýge shekteý engizilmek

ASTANA. QazAqparat – Elimizde bankter men shaǵyn qarjy uıymdaryna jeke tulǵalardyń merzimi ótken zaımdaryn kollektorlyq kompanııalarǵa berýine shekteý engizilmek. Bul jaıynda Qarjy naryǵyn retteý jáne damytý agenttigi tóraǵasynyń orynbasary Oljas Qızatov aıtty, dep habarlaıdy QazAqparat tilshisi.

Búgin Ádilet vıtse-mınıstri Alma Muqanovanyń tóraǵalyǵymen ótken zań jobalaý qyzmeti máseleleri boıynsha vedomstvoaralyq komıssııanyń otyrysynda «QR keıbir zańnamalyq aktilerine qarjy naryǵyn damytý jáne qarjylyq kórsetiletin qyzmetterdi tutynýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly» másele qaraldy.

Bankter men shaǵyn nesıe uıymdary zaımdy kollektorlyq agenttikke bergenge deıin atalǵan qaryzdy qaıta qurylymdaý úshin 18 aılyq merzim belgilegimiz keledi, ıaǵnı bul zaımnyń sharty qaryz alýshy – jeke tulǵa úshin jaqsartylýy tıis. Múmkin syıaqy mólsherlemesi tómendetilýi, bankter men shaǵyn qarjy uıymdary tarapynan qaryzdyń bir bóligi keshirilýi, zaımdy óteý merzimi uzartylýy qajet shyǵar. Demek, qaryz júktemesi tómendeıdi jáne de bankter men shaǵyn qarjy uıymdary qaıta qurylymdaý júrgizgennen keıin ǵana mundaı nesıelerdi kollektorlyq agenttikterge bere alady

, - dedi otyrystan keıin BAQ ókilderine suhbat bergen Oljas Qızatov.

Onyń sózine qaraǵanda, búginde qoldanystaǵy zańǵa sáıkes, jeke tulǵanyń beresheginiń tóleý merzimi ótip ketse, onda bankter de, shaǵyn qarjy uıymdary da birden zaımdy qaıtaryp alý quqyǵyn kollektorlyq agenttikterge bere alady.