Bankterdiń jınaq shyǵyny qańtar-shildede 204 mlrd teńgege jýyqtady
Berilgen aqparatqa qaraǵanda, 2016 jyldyń shildesinde Qazaqstan bankteriniń kirisi 243,8 mlrd teńgeni quraǵan. Esep kezeńinde qyzmet júrgizip otyrǵan 33 banktiń 5-eýinde shyǵyn tirkelgen, ótken jyldyń osy kezeńinde 35 banktiń 3-eýinde keri kórsetkish baıqalǵan bolatyn.
«Qazkommertsbank» AQ shyǵyny 405,6 mlrd teńge bolsa, qalǵan tórteýdiń, ıaǵnı «Eýrazııalyq bank» AQ, «Delta Bank» AQ, «Capital Bank Kazakhstan» AQ jáne «Pákistan UB» EB AQ bankteri shyǵyndarynyń jıyntyq mólsheri 15,6 mlrd teńgeni quraǵan.
Tabysqa jetken 28 banktiń 18-i ótken jylǵymen salystyrǵandaǵy óz kórsetkishterin arttyrǵan. Qańtar-shilde kezeńindegi tabystyń joǵary kórsetkishteri boıynsha «Qazaqstan Halyq banki» AQ 88,3 mlrd teńgemen kósh bastap tur, onyń artynan 26,7 mlrd teńgemen «Kaspi Bank» AQ jáne «Qazaqstannyń Turǵyn-úı qurylys jınaq banki» AQ 14,6 mlrd teńgemen keledi. QR bankteriniń syıaqy alýǵa baılanysty kiristeri esep kezeńinde 1,5 trln teńgeni, al shyǵyndary 814,4 mlrd teńgeni quraǵan.
Negizgi qyzmet boıynsha shyǵyndardan kiristerdiń artý qorytyndylary 669,2 mlrd teńgege jetken. Syıaqy alýǵa baılanysty emes kirister syıaqylardy tóleýge baılanysty emes shyǵyndardan 835 mlrd teńgege az bolǵan, ıaǵnı 16,3 trln teńge kiris bolsa, shyǵyndar 17,1 trln teńgeni quraǵan. Qazaqstan bankteriniń jalpy shyǵyndary (tabys salyǵyn eseptemegende) kiristerden 165,8 mlrd teńgege kóp. Óz kezeginde tabys salyǵy shyǵyndary 38,1 mlrd teńgeni quraǵan.