Bankterdiń operatsııalardan tapqan paıdasyna salyq salýdy qarastyramyz - Senat tóraǵasy

ASTANA. QazAqparat – «Qazaqstanda jumys isteıtin bankterdiń operatsııalar arqyly taýyp jatqan paıdasyna salyq salý máselesin qarastyramyz». Qazaqstan ulttyq telearnasynyń «Bas taqyryp» baǵadarlamasyna suhbat bergen Parlament Senatynyń tóraǵasy Máýlen Áshimbaev osylaı aıtty, dep habarlaıdy QazAqparat tilshisi.

«Búgingi kúni barlyq bank nesıelerine qaraıtyn bolsaq, sonyń 34%-y – tutynýshylyq kredıtterge berilgen. Shaǵyn jáne orta bızneske berilgen nesıelerdiń úlesi 25-26% kóleminde. Demek, bankterge ekonomıkanyń naqty salalaryna aqsha salǵansha, qarapaıym azamattarǵa tutynýshylyq nesıe bergen tıimdi, paıyzy kóp jáne táýekeli de az. Nege bulaı bolyp otyr? Sebebi, kásipkerlerge nesıe bergenge qaraǵanda, memlekettiń qundy qaǵazdaryn ala salǵan jeńildeý, paıyzy da óte joǵary. Máselen, Ulttyq bank notalaryna jyldyq 14,5% tólenedi. Munda táýekel joq. Prezıdent bul saıasatty ózgertý qajettigin aıtty. Sol sebepti, bankterdiń operatsııalar arqyly taýyp jatqan paıdasyna salyq salý máselesin qarastyramyz», - dep málim etti Máýlen Áshimbaev.

Senat tóraǵasy atap ótkendeı, salyq salýdy engizý úshin aldymen tıisti zańdarǵa ózgeris engiziledi. Bul baǵyttaǵy keıbir zańdar Parlamenttiń qaraýyna tússe, al qalǵany endi engiziledi.