Bankrottyqqa qatysty aqparatty qaıdan alýǵa bolady

ASTANA. QazAqparat – Ózin bankrot dep jarııalamaq bolǵan qazaqstandyqtar tolyq aqparatty qaıdan bile alady? Bul saýalǵa Premer-Mınıstrdiń orynbasary – Qarjy mınıstri Erulan Jamaýbaev jaýap berdi, dep habarlaıdy QazAqparat tilshisi.

Ótken jyly 30 jeltoqsanda Memleket basshysy «Qazaqstan Respýblıkasy azamattarynyń tólem qabilettiligin qalpyna keltirý jáne bankrottyǵy týraly» Zańǵa qol qoıyldy. Atalǵan qujat bıyl 1 qańtarda resmı túrde jarııalanyp, 3 naýryzdan bastap bankrottyq týraly ótinishterdi qabyldaý bastalady.

«Qazir uıymdastyrý jáne tehnıkalyq is-sharalar júrip jatyr. Aldymen BAQ jáne qyzmet kórsetý ortalyqtarynda aqparattyq súıemeldeý uıymdastyrylýda. Bankrottyqqa qatysty tıisti aqparat buqaralyq aqparat quraldarynda jarııalanady. Mınıstrlik pen oǵan baǵynysty vedomstvolardyń saıttarynda túsindirý aqparaty ornalastyrylyp, azamattarǵa SMS taratylyp jatyr. Sondaı-aq, azamattar qyzmet kórsetý ortalyqtary arqyly keńes alýyna bolady. Olarǵa bankrottyq zańnyń negizgi erejeleri túsindirilip, jadynama taratylady», - dedi Erulan Jamaýbaev Úkimet otyrysynda.

Odan bólek, mınıstrdiń aıtýynsha, qazir «Azamattarǵa arnalǵan úkimet» baılanys ortalyqtary jáne memlekettik kirister komıteti arqyly túsindirý jumystary júrip jatyr. Jyl bastalǵaly 4 jáne 5 qańtarda 570 adam bankrottyqqa qatysty keńes alǵan.

«Ákimdikter de memlekettik organdardyń óńirlik bólimsheleri, bankter, halyqqa qyzmet kórsetý ortalyqtary jáne halyqty jumyspen qamtý ortalyqtary basshylarynyń qatysýymen azamattardyń bankrottyq rásimderin uıymdastyrý boıynsha keńester ótýde. Memlekettik kirister basqarmasynyń qyzmetkerleri oqyp jatyr. Kún saıyn «Azamattarǵa arnalǵan úkimet» jáne memlekettik kirister komıtetiniń qyzmetkerlerimen birge onlaın-konferentsııalar ótkiziledi, onda zań normalary túsindirilýde, sondaı-aq azamattardan kelip túsetin problemalyq máseleler talqylanýda», - deıdi ol.