Bankrottyqqa bergen ótinishińiz qabyldanbasa ne isteý kerek

ASTANA. QazAqparat – Bankrot mártebesin alýǵa berilgen ótinish qanaǵattandyrylmaı, bas tartqan jaǵdaıda onyń sebepterin joıý úshin quzyrly memlekettik organdarǵa júginýge bolady. Bul jaıynda Qarjy vıtse-mınıstri Erjan Birjanov málim etti, dep habarlaıdy QazAqparat tilshisi.

«Aldymen bank aldyndaǵy qaryzy, ıaǵnı nesıeni óteý boıynsha sol bankke, mıkroqarjy uıymy nemese kollektorlik agenttikke júgingen jón. Klıenttiń atynda jyljymaıtyn múlik bolǵan jaǵdaıda halyqqa qyzmet kórsetý ortalyǵy nemese elektrondy úkimet portaly arqyly ádilet organdaryna ótinish bildire alady», – dedi Erjan Birjanov OKQ-de ótken brıfıngide.

Onyń málimdeýinshe, bankrottyqty rásimdeý barysynda avtokólik boıynsha másele týyndasa Іshki ister mınıstrliginiń aýmaqtyq bólimshelerine nemese mamandandyrylǵan halyqqa qyzmet kórsetý ortalyǵyna habarlasý qajet.

«Bankrot mártebesin taǵaıyndaýda jer ýchaskesiniń bolýy, tórt túlik maly jáne arnaıy tehnıkasy kedergi keltirse, máseleni jergilikti ákimdik arqyly sheshý múmkindigi bar. Al klıenttiń jeke kásibi bary anyqtalsa, memlekettik kirister organyna júgingen abzal», - deıdi mınıstr orynbasary.

Eske salsaq, 3 naýryzda elimizde bankrottyqqa ótinim qabyldaý bastaldy.

Erjan Birjanov keltirgen statıstıkaǵa sáıkes, búgingi jaǵdaı boıynsha 34 myńnan astam qazaqstandyq ózin bankrot dep jarııalaýǵa ótinish bergen.

Sondaı-aq, brıfıng barysynda 7 myńnan asa azamattyń bankrottyqqa bergen ótinishi qanaǵattandyrylmaǵany aıtyldy.

Odan bólek, ózin bankrot dep jarııalaǵandar 5 jyl boıy nesıe ala almaıdy.