Bankrottyq jarııalaý qyzmeti eGov.kz jáne eGov Mobile qosymshasynda qoljetimdi

ASTANA. QazAqparat – «Sottan tys bankrottyq protsedýrany qoldaný» memlekettik qyzmeti eGov.kz portaly men eGov Mobile qosymshasynda qoljetimdi. Sottan tys bankrottyq rásimin qoldaný jáne toqtatý týraly ótinish berýge bolady, dep habarlaıdy QazAqparat «Ulttyq aqparattyq tehnologııalar» AQ qoǵammen baılanys basqarmasyna silteme jasap.

Búgin, 3 naýryzda kúshine engen «Qazaqstan Respýblıkasy azamattarynyń tólem qabilettiligin qalpyna keltirý jáne bankrottyǵy týraly» Zańǵa sáıkes eGov.kz portalynda jáne eGov Mobile mobıldi qosymshasynda bankrottyqqa ótinishti boryshkerdiń ózi ǵana bere alady.

Ótinish berer aldynda boryshker aldymen myna málimetterdi tekserý kerek:

- bankter, mıkroqarjy uıymdary, kollektorlyq agenttikter aldyndaǵy bereshek 5,5 mln teńgeden aspaýy tıis jáne merzimi keminde 12 aı bolýy kerek;

- ortaq menshikti múlikti qosa alǵanda múliktiń menshik quqyǵynda bolmaýy;

- banktiń nemese mıkroqarjy uıymynyń shart talaptaryn ózgertýden bas tartý týraly jaýabyn usyný (banktiń nemese mıkroqarjy uıymynyń jaýaby bolmaǵan jaǵdaıda, boryshker ótinishiniń kóshirmesi nemese ótinishtiń elektrondyq formatta jiberilgeni týraly rastama);

- eger qaryz 5 jyldan artyq ótelmese, onda atalǵan sharttyń birde-biri eskerilmeıdi;

- AÁK alýshylary sanalatyn boryshkerler 6 aı boıy osy rásimdi qoldaný úshin merzimi ótip ketken ýaqytty esepke almaı ótinish bere alady;

- mobıldi azamattar bazasynda (MAB) boryshker men jubaıynyń telefon nómiriniń tirkelgenin tekserý kerek. Uıaly nómirdi tirkeý úshin silteme boıynsha ótý kerek – my.egov.kz.

«Qurmetti paıdalanýshylar, eGov.kz portalynda jáne Halyqqa qyzmet kórsetý ortalyǵynda barlyq qajetti qujattarsyz ótinish berýdiń máni joq, eń aldymen ekinshi deńgeıli bankterden qajetti rastaýlardy alyńyzdar. Osydan keıin ǵana jeke tulǵanyń bankrottyǵyna ótinish berýge bolady», - deıdi «Ulttyq aqparattyq tehnologııalar» AQ Basqarma tóraǵasy Rostıslav Konıashkın.

EGov.kz portalyndaǵy jańa qyzmetti portaldyń basty betinde jáne «Azamattarǵa» - «Keden jáne salyqtar» - «Ekonomıka jáne qarjy» bóliminen tabýǵa bolady. Analogııalyq qyzmet eGov Mobile mobıldi qosymshasynyń «Arnaıy qyzmetter» bóliminde qoljetimdi.

Sottan tys bankrottyqqa ótinish berý úshin:

- «Qazaqstan Respýblıkasy azamattarynyń tólem qabilettiligin qalpyna keltirý jáne bankrottyǵy týraly» Zańda kózdelgen azamatty bankrot dep taný týraly sottan tys aryz berý sharttarynyń saqtalýyn rastaý;

- nekede bolý jaǵdaıynda jarynyń JSN-in kórsetý;

- nesıeler bar qarjy ınstıtýttary týraly málimetterdi toltyrý;

- salyq organyn kórsetý jáne qujattardyń kóshirmelerin qosý;

- AÁK alýshy bolsa, belgi qoıý;

- eger mindettemelerdi oryndaý merzimi 5 jyldan astam bolsa, belgi qoıý;

- ótinishke bir rettik qupııa sóz nemese ETsQ arqyly qol qoıý;

- ótinishti jibergennen keıin ótinish berýshiniń jary Jeke kabınette ótinishti maquldaıdy.

Qyzmet nátıjesi 15 jumys kúni ishinde Jeke kabınette sheshimge silteme túrinde paıda bolady. Sheshimdi QR Qarjy mınıstrligi saıtynan qaraýǵa bolady. Sottan tys bankrottyq rásimi 6 aıǵa deıin sozylady.

Sonymen qatar, atalmysh qyzmet bankrottyq týraly sottan tys is júrgizýdi toqtatý týraly ótinish berýdi qarastyrady. Rásim paıdalanýshy týraly aqparat jarııalanǵan kúnnen bastap 6 aıda qarastyrylady.

Jańa qyzmet «Ulttyq aqparattyq tehnologııalar» AQ, Tsıfrlyq damý, ınnovatsııalar jáne aeroǵarysh ónerkásibi mınıstrliginiń men Qarjy mınıstrliginiń birlesken jumysynyń arqasynda iske asyryldy.