Bankrottyq rásimin qoldana alatyn ıpotekasy bar adamdardyń sany belgili boldy

ASTANA. QazAqparat – Qarjy naryǵyn retteý jáne damytý agenttigi tóraǵasynyń birinshi orynbasary Nurlan Ábdirahmanov bankrottyq rásimin qoldana alatyn ıpotekasy bar adamdar týraly aıtty, dep habarlaıdy QazAqparat tilshisi.

«Bankrottyq rásimin paıdalana alatyn ıpotekalyq qaryz alýshylardyń sany shamamen 6,5 myń adamǵa jetip otyr. Qazirgi ýaqytta barlyq ıpotekalyq nesıe portfeli shamamen 4,7 trln teńgeni qurap otyr jáne 449 myńǵa jýyq qaryz alýshy tirkeldi», - dedi N.Ábdirahmanov Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, baspanany saqtap qalý úshin turǵyndarǵa merzimi ótken nesıeni qaıtarýǵa múmkindik beretin sotqa deıingi retteý tártibi qarastyrylǵan.

«Bul tártip byltyr kúshine engen edi. Oǵan sáıkes qaryz alýshy tólem merzimi keshiktirilgennen keıin, 30 kún ishinde ótinish beredi jáne bank nesıeni qaıta qurylymdaý týraly ótinishti 15 kún ishinde qaraýy kerek. Sondaı-aq, 2022 jyly ıpotekalyq nesıe alýshylardyń quqyqtary zańnamalyq turǵyda kúsheıtildi», - dedi N. Ábdirhamanov.

«Jalpy, agenttik áleýmettik jaǵynan osal sanattaǵy qaryz alýshylardyń quqyqtaryn qorǵaý boıynsha qosymsha áreketterdi iske asyryp jatyr. Olar úshin 2015 jyldan bastap ıpotekany qaıta qarjylandyrý baǵdarlamasy eskerilgen. Onyń aıasynda qazirdiń ózinde 9,5 myńǵa jýyq azamattyń qaryzy boıynsha aýyrtpalyǵy jeńildedi. Biz bul baǵdarlamany bıylǵy shilde aıyna deıin uzartýdy josparlap otyrmyz. Budan bólek, áleýmettik turǵyda osal sanattaǵy 967 myńǵa jýyq qaryz alýshyǵa qosymsha qarjylaı qoldaý jasamaqpyz», - dedi ol.

Budan buryn habarlanǵandaı, qaryzy jabylmaǵan adamdar 2023 jyldyń 3 naýryzynan bastap bankrottyqqa ótinish bere alady.

Jeke tulǵany bankrot dep taný tártibi qandaı? Kimder ózin bankrot dep jarııalaı alady? Onyń saldary qandaı bolmaq? Osy jáne ózge de suraqtarǵa tolyǵyraq jaýap alý úshin QazAqparat sarapshysynyń materıalyn oqı alasyzdar.