Bankrot jarııalaýǵa ótinish berýde qandaı qatelikter jiberiledi

ASTANA. QazAqparat – Qazaqstandyqtardyń bankrot mártebesin alýǵa nıet bildirý barysynda jıi ketetin qatelikter ataldy. Tolyǵyraq Qarjy mınıstrligi memlekettik kirister komıteti bereshekpen jáne dármensiz boryshkerlermen jumys basqarmasy basshysynyń orynbasary Merýert Sısembaeva aıtyp berdi, dep habarlaıdy QazAqparat tilshisi.

«Keıbir azamattar bankrottyqa ótinishti ústi-ústine jiberedi Bir klıenttiń 16 ótinish jibergen jaǵdaıy tirkelgen. Sol sııaqty ótinishti bas tartylsa da qaıta jiberetin azamattar bar. Ótinish qanaǵattandyrylmaǵannan keıin araǵa úsh aı ýaqyt salyp baryp qaıta berýge bolady. Taǵy bir usynys klıentter ótinishte kredıt alǵan qarjy uıymdary ataýy men alǵan naqty somany kórsetse», - dedi Merýert Sısembaeva memlekettik kirister komıtetiniń Instagram paraqshasynda ótken tikeleı efır barysynda.

Onyń aıtýynsha, somany durys kórsetpeıtin klıentter barshylyq, nátıjesinde ótinish keri qaıtarylady.

«BAQ betterinde bir klıenttiń 1 800 teńge bereshegi keshirilip, ótinishi qanaǵattandyrylyp, bankrot atandy degen aqparat shyqty. Ol azamatty taýyp, naqtylaı kele, 1 mln 800 myń teńge bereshegi bary anyqtaldy. Al keıbir azamattar qarjy uıymdary nemese lombardtan alǵan qaryzdaryn kórsetpegen», - deıdi ol.

Buǵan deıin 50 myńǵa jýyq qazaqstandyq ózin bankrot dep jarııalaýǵa ótinish bildirgeni týraly habarlaǵan edik.