Bankomattan aqsha alǵanda qansha komıssııa alynady
Bankterdiń aqsha alǵany úshin komıssııalyq tólem ustaıtyny qazaqstandyqtardyń kóńilinen shyǵa bermeıtini anyq. Kóbinese bankomattan aqsha alǵan úshin ustalatyn komıssııaǵa kópshilik narazy bolyp jatady.
«Eger karta «Jalaqy jobasy» boıynsha ashylsa, bul shottan aqshany qolma qol alǵan kezde Halyk bank nemese Qazkom komıssııa ustamaıdy. Eger karta «Standart» boıynsha jeke maqsatta ashylsa, onda ár somadan 1 paıyz kóleminde komıssııa ustalady», - dedi Ú.Shaıahmetova.
Visanyń QR-tehnologııasy negizinde jasalǵan mobıldi tólemder tanystyrylymy kezinde Úmit Shaıahmetova qolma-qol aqshadan komıssııa ne maqsatpen ustalatynyn aıtty.
«Qolma-qol aqsha qymbat. Biz olarǵa ınkassatsııa jasaımyz, Ulttyq bankten satyp alamyz, tasymaldaımyz. Belgili bir kólemde operatsııalyq shyǵyndar bolady. Sonyń eń tómengi kórsetkishi boıynsha bank komıssııa mólsherin taǵaıyndaıdy.
Osylaısha adamdardy karta arqyly tólem jasaýǵa úıretemiz. Óıtkeni biz múddelimiz. Biz úshin elektrondy tólemdi jınaý, qolma-qol aqshany jınaýdan tıimdirek.
Bizde Halyk-ınkassatsııa kompanııasy bar. Ondaǵy tarıfter joǵary. Ókinishke oraı, kásipkerler pos-termınal qoıǵannan góri áli de ınkassatorlardyń qyzmetin paıdalanǵandy unatady. Al pos-termınal ınkassatsııadan anaǵurlym arzan túsedi. Shaǵyn kásipkerler aqshany jınap alyp kelip bankke salady. Olar ınkassatsııa qyzmetin de paıdalanbaıdy. Bul bankterge emes kerisinshe kásipkerlerge qoıylatyn suraq. Sondyqtan komıssııadan qashqan adamdarǵa barlyǵyn karta arqyly tóleý jasaýǵa shaqyramyz», - dedi Úmit Shaıahmetova.
Onyń aıtýynsha, qarjy ınstıtýty QR Ulttyq bankine jalpy qyzmet kórsetýdi jaqsartý úshin birneshe usynys engizgen.
Atap aıtqanda, qolma-qol aqshasyz tólem jasaıtyn kásipkerlerge salyqtyq jeńildik berý usynylǵan.
«Mundaı ózgerister naryqtyń talaby bolyp otyr. Qazir memleket te qolma qol aqshasyz tólem jasaýdy qoldap otyr. Bul álemdik trend, sondyqtan biz de erte me kesh pe oǵan oralatyn bolamyz», - dedi ol.