Bank RBK-da jatqan BJZQ qarjysy qaıtaryla ma
«Qazınvestbank pen Delta bankte zeınetaqy qorynyń merzimi ótken aktıvteri joq. Olar lıtsenzııanyń qaıtarylyp alýyna deıin óteldi. Al, Bank RBK shottarynda jatqan 49 mlrd. teńgege jýyq zeınetaqy aktıvterine keler bolsaq, qarjylyq retteýshi men bank aktsıonerleri bankke qatysty qabyldaǵan qalpyna keltirý baǵdarlamasy men sharalardy eskere otyryp, bul aqshalar qaıtarylmaıdy degen eshqandaı qaýip kórip turǵan joqpyz. Olar qalypty rejımde qyzmet etiledi», - dedi baspasóz konferentsııasynda BJZQ basqarma tóraıymy Nurbıbi Naýryzbaeva. Sonymen qatar, BJZQ qarajattarynyń saqtalýy maqsatynda olar qazir túrli jerge ınvestıtsııalanýda.
«Búgingi tańda sheteldik memleketterdiń memlekettik qundy qaǵazdar úlesi bastapqy 5 paıyzdan 10 paıyzǵa deıin artty. Sheteldik bankterde depozıtter paıda boldy. Ol 5 paıyz. Biraq, ony negizgi tabys kózi dep aıtýǵa bolmaıdy. Negizgi úles - bul elimizdiń memlekettik qundy qaǵazdary. Olar 43 paıyzdy quraıdy. Olar ortasha eseppen 8-9 paıyz tabys ákeledi. Qazaqstandaǵy naryqtyq jaǵdaıdy esepke alǵanda, bul jetkilikti tabys», - dedi BJZQ basqarma tóraıymy.
N.Naýryzbaevanyń aıtýynsha, sheteldik memleketterdiń qundy qaǵazdary men sheteldik bankterdegi depozıtterdiń tabystylyǵy shetel valıýtasynda negizgi quraldar boıynsha tabystylyqpen salystyrǵanda tómen.
«Ulttyq bank portfeldi ártaraptandyrýdy iske asyryp jatyr. Sheteldik memleketterdiń kóptegen qundy qaǵazdaryn ıelený portfeldi ártaraptandyrý maqsatynda júzege asyrylyp jatyr. Bul valıýtalyq táýekelderdi hedjerleý men uzaqmerzimdi perspektıvada tabysqa ıe bolý úshin qajet. Sebebi, zeınetaqy aktıvteri - bul uzaqmerzimdi ınvestıtsııalar. Ulttyq bank BJZQ portfeliniń bir bóligin mandat boıynsha basqa tabys kózin usynýy múmkin sheteldik basqarýshy kompanııalardyń basqarýyna beredi. Búgingi tańda Ulttyq qordyń qarajattary dál osyndaı tártippen basqarylady - bir bóligi sheteldik basqarýshy kompanııalardyń basqarýyna berilgen. Zeınetaqy aktıvterine de dál osylaı jasaý josparlanǵan. Kelisimshart bekitilgen, Ulttyq bank bul baǵytta jumysyn qarqyndatpaq», - dedi N. Naýryzbaeva.
Eske sala keteıik, sársenbi kúni ótken baspasóz konferentsııasynda Bank RBK top-menedjerleri bankti qalpyna keltirý boıynsha naqty qadamdardy aıtqan bolatyn.