Bangladesh soty tártipsizdikten keıin jumysqa ornalastyrý kvotasyn joıdy

<p>ASTANA. KAZINFORM&mdash; Bangladeshtiń Joǵarǵy soty 100-den astam adamnyń ómirin qıǵan jappaı tolqýlar týdyrǵan memlekettik sektordaǵy jumys kvotalarynyń kópshiligin joıdy, dep jazady <a href="https://www.bbc.com/russian" target="_blank" rel="noopener">VVS</a>.</p>

Memlekettik sektordaǵy jumys oryndarynyń úshten biri 1971 jyly Pákistannan shyqqan táýelsizdik soǵysy ardagerleriniń týystaryna bólingen. Biraq qazir sot olarǵa orynnyń tek 5%-yn ǵana bólýge bolady dep sheshti.

Joǵarǵy sottyń qaýlysyna sáıkes, memlekettik sektordaǵy jumys oryndarynyń 93%-y kásibı jaramdylyǵyna qaraı adamdarmen, 5%-y revolıýtsııalyq soǵys ardagerleriniń otbasy múshelerine, al qalǵan 2%-y etnıkalyq azshylyq ókilderine nemese múgedekterge taǵaıyndalýy kerek.

2018 jyly premer-mınıstr Sheıh Hasınanyń úkimeti kúshin joıǵan kvota júıesin maýsym aıynda tómengi sot qalpyna keltirip, jurtshylyq narazylyǵyn týǵyzdy.

Úkimet bul qaýlyǵa áli jaýap qaıtarǵan joq. Biraq kvotany saqtaǵysy kelgenderdiń múddesin qorǵaıtyn zańger Shah Mandjýrýl Hake Joǵarǵy sot sheshimin tarıhı sheshim dep atap, sabyrǵa shaqyrdy.

El astanasy Dakkada ekinshi kúnnen beri komendanttyq saǵat jarııalandy, biraq keıbir aýdandarda oqshaýlanǵan qaqtyǵystar áli de bolyp jatyr. Joǵarǵy sot ǵımaratynyń aldynda bronetransporter tur, al sarbazdar elorda kóshelerin áli de patrýldeýde, dep habarlaıdy Reuters.

Narazylyq bildirýshilerdiń keıbiri tutqyndalǵany habarlandy. Basqalary qaqtyǵys kezinde qaza tapqandar úshin ádildik talap etýde.

Tártipsizdik saldarynan 115-ke jýyq adam qaza tapty degen boljam bar, biraq jergilikti aqparat quraldary qurban bolǵandardyń sany budan da kóp dep habarlady. Olardyń aıtýynsha, tek juma kúni kem degende 50 adam qaıtys boldy.

Úkimet qatań sharalar qabyldady, atap aıtsaq, komendanttyq saǵat jarııalanyp, baılanys úzildi.