Baljan Seıilova: Munaı men valıýta naryǵyndaǵy ózgerister - ýaqytsha qubylys

NUR-SULTAN. QazAqparat – Munaı men valıýta naryǵyndaǵy ózgerister - ýaqytsha qubylys. «Qarjy polıtsııasy organdary ardagerleriniń uıymy» qoǵamdyq birlestiginiń tóraıymy Baljan Seıilova osyndaı pikir bildirdi, dep habarlaıdy QazAqparat tilshisi.

«Bul jaǵdaı tek bizdiń elde ǵana emes, ıaǵnı barsha álemde oryn alyp otyrǵan daǵdarys. Koronavırýs, munaı baǵasynyń quldyraýyna biz sebepshi emespiz ǵoı. Bul óz kezeginde munaı boıynsha álemdik saıasatta týyndaǵan kelispeýshiliktiń saldary. Meniń oıymsha, dollarǵa shaqqandaǵy teńge baǵamynyń ózgerýi - ýaqytsha qubylys, aldaǵy ýaqytta barlyǵy laıyqty deńgeıinde turaqtaıdy», - dedi birlestik tóraıymy.

Onyń paıymynsha, QR Úkimet tarapynan qabyldanyp jatqan sharalar óziniń ońtaıly nátıjesin kórsetetin bolady.

«Sondyqtan dúrbeleń jasaýdyń reti joq dep oılaımyn. Negizi, munaıdyń quny birde kóteriledi nemese keı jaǵdaıda tómendeıtini naryqtyq úrdis. Sáıkesinshe, álemdik ekonomıkadaǵy ózgerister barsha eldi sharpyǵanyn kórip otyrmyz. Osy oraıda bul jaǵdaı bizge de áser etti. Osynyń saldary uzaqqa sozylmaıdy dep sanaımyn. Jalpy, Úkimettiń barlyq mindemettemelerin oryndaıtyny mańyzdy», - dedi Baljan Seıilova.

QazAqparat buǵan deıin álemdik munaı baǵasynyń quldyraǵanyn jáne osyǵan oraı QR Úkimeti men Ulttyq bank munaı naryǵyndaǵy jaǵdaıǵa baılanysty málimdeme jasaǵandyǵyn habarlaǵan bolatyn.