Balyq sharýashylyǵyna arnalǵan derbes agenttik qurý qajet - senator

ASTANA. QazAqparat - Balyq sharýashylyǵyna jaýapty ortalyq derbes memlekettik organ qurý kerek. Bul týraly Senatta balyq sharýashylyǵyn damytý máselesine arnalǵan otyrysta depýtat Sársenbaı Eńsegenov málim etti, dep habarlaıdy QazAqparat tilshisi.

«Elimizde balyq ónimine suranys joǵary. Bul salany damytý múmkindigi de zor. Endeshe, «osy salanyń ornyqty damýyna, básekege qabiletti bolýyna, ımportty almastyryp, eksportty ulǵaıtýyna ne kedergi?» degen suraqtyń týyndaýy zańdy. Meniń oıymsha, buǵan júıeli túrde sheshýdi qajet etetin birneshe sebepter bar. Birinshiden, balyq resýrstaryn memlekettik basqarýdyń tıimdi júıesi joq. Táýelsizdik jyldarynda balyq jóninde ortalyq memlekettik organ birneshe ret qurylymdyq ózgeristerge ushyrady. Qazirgi ýaqytta bul sala QR AShM Orman sharýashylyǵy jáne janýarlar dúnıesi komıtetine biriktirilgen. «Balyq» degen sózdiń komıtet ataýynda joq ekenin baıqap otyrǵan shyǵarsyzdar», - dep toqtaldy senator.

Onyń paıymynsha, balyq resýrstaryn basqarý jóninde ortalyq memlekettik organnyń turaqty bolmaýy, onyń qazirgi ýaqyttaǵy mártebesiniń tómendigi atalǵan salada nátıjeli memsaıasatty júrgizýge qolbaılaý bolýda.

«Men Úkimetke balyq sharýashylyǵynyń áleýmettik-ekonomıkalyq mańyzdylyǵyn eskere otyryp, óz aldyna derbes agenttik qurý qajettigin aıtqan bolatynmyn. Búginde de osy pikirdemin. Osy oraıda balyq sharýashylyǵyna jaýapty ortalyq derbes memlekettik organ qurý týraly jınalystyń hattamalyq sheshimine engizý týraly usynys jasaımyn», - dep atap ótti Sársenbaı Eńsegenov.

Budan bólek, balyq sharýashylyǵyn damytýǵa negizdelgen baǵdarlama kerektigin alǵa tartty.

«QR Agroónerkásiptik keshenin damytýdyń 2017-2021 jyldarǵa arnalǵan membaǵdarlamasy 29 betten turatyn aýqymdy qujat. Osy qujatta balyq sharýashylyǵynyń jaı-kúıi úsh-aq abzatstan turatyn akvaósirý máselesimen shektelgen. Aldaǵy osy memlekettik baǵdarlamanyń aıasynda nemese óz aldyna bólek arnaıy jospar qabyldaý qajet dep oılaımyz», - dedi depýtat.