Balyq ósirýdi 7,4 myńnan 300 myń tonnaǵa deıin arttyrý qajet – Myrzaǵalıev

NUR-SULTAN. QazAqparat – Halyqaralyq normaǵa sáıkes kelý úshin Qazaqstan balyq ósirý kólemin 7,4 myń tonnadan 300 myń tonnaǵa deıin arttyrýy qajet. Bul týraly búgin Úkimet otyrysynda QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.

«Birikken ulttar uıymyndaǵy Azyq-túlik jáne aýyl sharýashylyǵy uıymynyń málimeti boıynsha, akvaósirý salasy eń qarqyndy damyp kele jatqan baǵyt bolyp sanalady. Máselen, ósiriletin balyqtyń álemdik kólemi 60 jyl buryn nebary 1 mln tonnany qurasa, búginde bul kórsetkish 82 mln tonnadan asyp túsedi. Bul rette, sońǵy 25 jyldyń ózinde akvaósirý kólemi 67 mln tonnaǵa nemese 450% ósti. Al balyq aýlaý kólemi, turaqty deńgeıde», - deıdi Maǵzum Myrzaǵalıev.

Onyń aıtýynsha, Qazaqstanda balyq ósirý salasynyń áleýeti óte joǵary.

«Sońǵy 7 jylda ósirilgen balyq kólemi 9 ese, ıaǵnı 800 tonnadan 7,4 myń tonnaǵa deıin ósti. Elimizde osy sharýashylyqpen 180 balyq ósirý sharýashylyǵy aınalysady, onda 1126 adam jumys isteıdi. Biraq bul – jetkiliksiz. Jasandy balyq ósirý sharýashylyqtary budan da kóp bolýy kerek. Dúnıejúzilik densaýlyq saqtaý uıymy usynǵan jan basyna shaqqanda 16 kg balyq tutyný normasyna qol jetkizý úshin shamamen 300 myń tonna balyq ósirý qajet», - deıdi ol.

Mınıstr balyqty jasandy ósirý boıynsha Túrkistan oblysy kóshbasshy (5 myń tonna) bolyp otyrǵanyn atap ótti.

«Al Almaty oblysynda shamamen 1000 tonna, Soltústik Qazaqstan oblysynda 380 tonna jáne Shyǵys Qazaqstan oblysynda shamamen 300 tonna balyq ósiriledi», - dedi QR Ekologııa, geologııa jáne tabıǵı resýrstar mınıstri.

Eske salaıyq, M.Myrzaǵalıev qazaqstandyqtar balyqty az tutynatynyn aıtqan bolatyn.