Balyq ósirýde nelikten Ózbekstannan artta qalyp otyrmyz

ASTANA. QazAqparat – Balyq ósirýde nelikten Ózbekstannan artta qalyp otyrmyz? QR Premer-Mınıstri Álıhan Smaıylovtyń bul saýalyna búgin Úkimet otyrysynda Ekologııa, geologııa jáne tabıǵı resýrstar mınıstri Serikqalı Brekeshev jaýap berdi, dep habarlaıdy QazAqparat tilshisi.

«Kórshiles Ózbekstandy qarasaq, olarda sý kózderi bizge qaraǵanda az. Sonymen birge olardyń balyq sharýashylyǵy bizge qaraǵanda jaqsy damyǵan. Birneshe ese kóp balyq óndiriledi. Ózbekstan tájirıbesin nege qaramaısyzdar? Bizge sonda ne kedergi bolyp tur?», - dep surady Úkimet basshysy Serikqalı Brekeshevten.

Mınıstr de kórshi elde akvaósirý baǵyty jaqsy damyp kele jatqanyn rastady.

«Mınıstrliktiń mamandary, otandyq bıznes ókilderi birlesip byltyr Ózbekstanǵa baryp keldi. Ózbekstannyń negizgi aıyrmashylyq faktory – bul qolaıly tabıǵı-klımattyq jaǵdaıy. Olardyń balyqty jyl boıy ósirýge múmkindigi bar. Bizdegideı kólemdegi balyqty tabıǵı sý qoımalarynan aýlamaıdy. Sonymen birge Ózbekstanda akvaósirý týraly zań qabyldanǵan. Qazaqstanda dál sondaı zań jobasy ázirlendi. Ol kelesi jyldyń qarashasyna deıin Parlament qaraýyna engiziledi. Bul rette klımattyq jaǵdaıy bizge uqsas ozyq elderdiń tájirıbesin zerdelep, zamanaýı tehnologııalaryna basty nazar aýdardyq. Bul baǵytta aýqymdy jumys júrgizilip, kúrdeli saraptama jasaldy. Jaqyn merzimdegi maqsatymyz - akvamádenıeti damyǵan elder deńgeıindegi óndiris kólemine shyǵýǵa zańnamalyq múmkindik týǵyzý», - dedi Serikqalı Brekeshev.

Foto: t.me/KZgovernment