Balyq ónimderin óndirý sýbsıdııalanady

ASTANA. QazAqparat - Balyq aýlaýmen aınalysatyn sýbektiler úshin qosymsha qun salyǵy 70 paıyzǵa tómendetiledi. Bul týraly búgin Úkimet otyrysynda QR Ekologııa, geologııa jáne tabıǵı resýrstar mınıstri Serikqalı Brekeshev aıtty, dep habarlaıdy QazAqparat tilshisi.

«Otandyq óndirýshilerdi qoldaý maqsatynda «Salyq kodeksine ózgerister engizý týraly» zań jobasy aıasynda kásiptik balyq aýlaýmen aınalysatyn sýbektiler úshin qosymsha qun salyǵyn 70 paıyzǵa tómendetý kózdelýde. Zań jobasy Parlamentte qabyldandy jáne Memleket basshysyna qol qoıýǵa joldandy. Sondaı-aq tereń óńdelgen balyq ónimderin sýbsıdııalaýdy engizý josparlanǵan. Tıisti túzetý bıznesti júrgizý máseleleri jónindegi zań jobasynda kózdelgen», - dedi mınıstr Úkimet otyrysynda.

Mınıstrdiń aıtýynsha, kóleńkeli bıznes aınalymyn tómendetý maqsatynda balyq ónimderin qadaǵalaýdyń aqparattyq júıesi ázirlenip jatyr. Onda balyq ónimderin óńdeý zańdylyǵyn rastaıtyn qujattardy berýge qatysatyn veterınarııalyq, kedendik jáne ózge de múddeli memlekettik organdardyń júıelerin ıntegratsııalaý kózdelgen.

«Jyl saıyn sý aıdyndarynda balyq resýrstaryn molaıtý boıynsha sharalar qabyldanady. Atyraý oblysynda 2 memlekettik bekire zaýyty jumys isteıdi. Alaıda olardyń óndiristik bazasy tozǵan. Olar qaıta qurý men jańǵyrtýdy qajet etedi. Qazirgi ýaqytta ınvestıtsııalyq usynys ázirlenýde. Ony kelesi jyldyń birinshi toqsanynda Ulttyq ekonomıka mınıstrliginiń qaraýyna engizý josparlanǵan. Protsesti jedeldetý úshin zaýytty jańǵyrtý kezinde tehnıkalyq-ekonomıkalyq negizdemeler ázirleýdi talap etpeıtin bıýdjettik ınvestıtsııalyq jobalar tizbesine engizýdi usynamyz. Bul bıýdjet qarajatyn únemdeýge jáne jobany iske asyrý merzimin qysqartýǵa múmkindik beredi. Jalpy bul máseleni Úkimet qaýlysyn ázirleýge jaýapty Indýstrııa jáne ınfraqurylymdyq damý mınıstrligi qoldap otyr», - dedi Serikqalı Brekeshev.