Balyq emes, qarmaq ber: Qaıyrymdylyq qory zeınetkerlerge qalaı kómektesýde

NUR-SULTAN. QazAqparat – «Adal Nıet Astana» jekemenshik qaıyrymdylyq qory dertke shaldyqqan adamdar men qarııalar, ómirlik qıyn jaǵdaıǵa tap bolǵandardy jatatyn oryn, tamaqpen ǵana qamtymaı, aqsha tabýǵa kómektesedi. Qordyń basshysy Bıbisara Beısenbaeva QazAqparat tilshisine uıymnyń bolashaq jospary týraly aıtyp berdi.

- Bıbisara Nurtaıqyzy, qaıyrymdylyq qorynyń jalpy jumysy týraly aıtsańyz.

- Bizdiń qaıyrymdylyq qorynyń negizgi mindeti - 18 jastan asqandarǵa áleýmettik ortalyq bolý. Biz 18-92 jas aralyǵyndaǵy turǵyndarmen jumys isteımiz. Olar munda táýlik boıy bolady, kóbinese olarǵa medıtsınalyq-áleýmettik kómek kórsetemiz. Bizdiń uıym quramynda mentaldy dertke shaldyqqandar, egde jastaǵy jáne qarııalarǵa arnalǵan pansıon, hospıs jáne ońaltý ortalyqtary bar. Munyń bári egde jastaǵylarǵa kútim jasaý úshin ashylǵan. Ádemi qartaıa bilý kerek. Bizdiń elimizde medıtsınalyq jáne áleýmettik kómek jekeleı kórsetiledi. Adamdy áleýmettik turǵydan qoǵamǵa beıimdeý úshin ne isteý kerek? Bizdegi qarııalardyń buryn mamandyqtary nemese hobbıleri bolǵan, sol sebepti eńbek terapııasy aıasynda sheberlik synyptaryn ótkizemiz.

- Olardyń kópshiligi nemen aınalysqandy jaqsy kóredi?

- Bireýi kitaphanashy bolsa, endi biri bala kezinde sýret salýmen aınalysqan, biraq ártúrli ómirlik jaǵdaıǵa baılanysty bári jolda qalǵan. Sondaı-aq, bizdiń qorda emdelýge arnalǵan oryndar - trenajerler, kardıo, basseın jáne massajǵa arnalǵan bólmeler bar. Barlyǵynyń bir jerde bolǵany kópshilikke unaıdy, sebebi olar kóńilderi qalaǵan ispen aınalysady. Bizdiń patsıentterdiń (121 adam) 51-i Aqmola oblysynyń 15 aýdanynan bolsa, 50 adam Nur-Sultan qalasynan jáne 16 adam ózge óńirlerden, 4 adam Reseı, Germanııa jáne Qyrǵyzstannan kelgen.

- Jekemenshik negizde qyzmet alýdyń baǵasy qandaı?

- Aıyna 120 myń teńge. Bul baǵa kóp ýaqyttan beri kóterilgen joq. Bul Qazaqstan boıynsha eń arzan baǵa dep aıtýǵa bolady. Bul qyzmet ishine bes ýaqyt tamaqtaný, dárigerler men medbıkeler qyzmeti jáne statsıonarly kómek kiredi. Munda shızofrenııa, Altsgeımer jáne Parkınson aýrýlary, Daýn sındromymen keletinder bar. 121 adamnyń 47-i sal aýrýyna shaldyqqandar. Olardy jýyndyryp, kıindirip, kútý kerek...

- Memleket tarapynan qandaıda bir qoldaý bar ma?

- Biz «Balyq berme, qarmaq ber» degen qaǵıda boıynsha jumys isteımiz. Memleket bizge osy qarmaqty berdi. Bizge tipti «balyq sharýashylyǵy salasyn» berdi desem bolady. Ózimizdiń óndirisimiz, marketıngimiz jáne osy iske qatysty shyǵarmashylyǵymyz bar. Qazir biz óz-ózimizdi qamtamasyz etemiz. Byltyr bir BUU-nyń eki grantyn utyp aldyq. Onyń birine jylyjaı salsaq, ekinshisine adamdardyń páterge bólek shyǵyp, jeke turýyna kómektesemiz. Memlekettik tapsyrysty memleket qarjylandyrady, sondaı-aq biz daıyndaǵan ónimderdiń bir bóligin satýǵa qatysady. Bul jerdegi joba jeke kásipkerlik negizinde júzege asady. Sonymen osylaı úshjaqty model qalyptasady. Qysqasha aıtqanda, memleket ishindegi memleket - biz ózimiz úshin ózimiz tólep, damýymyzdy jalǵastyrýdamyz.