Balýandardyń basty nazaryn Belgradtaǵy Álem chepıonatyna baǵyttap otyrmyz - Sport komıteti

ASTANA. QazAqparat – Sport jáne dene shynyqtyrý isteri komıteti tóraǵasynyń orynbasary Aıgúl Bektenova ortalyq kommýnıkatsııalar qyzmetinde ótken brıfıngide Astanadaǵy Azııa chempıonatynda Qazaqstan balýandaryna qandaı mindet júktelip otyrǵany týraly suraqqa jaýap berdi, dep habarlaıdy QazAqparat tilshisi.

«Kez kelgen sportshy Olımp shyńyn baǵyndyram, júldeli oryn alam dep daıyndalady. Biraq, tuǵyrda úsh oryn ǵana bar. Alaıda, kúres túrlerinen 4 oryn bar (eki úshinshi oryn – red.). Árqaısysy barynsha kúsh-jigerin salyp, el namysyn abyroımen qorǵap shyǵady dep oılaımyz», - degen komıtet ókili eshbir balýannyń atyn naqty atamady.

Onyń paıymynsha, qazir balýandardyń negizgi nazary kúzde Serbııa astanasynda ótetin jarysqa aýyp otyr.

«Bul Azııa chempıonatynyń aldynda ár kúres túrinen eki kezeńnen turatyn jattyǵý jıyndary ótkizildi. Sonymen qatar, Álem chempıonatyna da daıyndyq qarqyndy júrip jatyr. Jattyǵý jıyndary, jarystar belgilengen jumys jospary boıynsha júrgiziledi. Qyrkúıek aıynda Belgradta (Serbııa) ótetin Álem chempıonaty lıtsenzııalyq týrnır bolyp esepteledi. Sodan bir apta ótkende Azııa oıyndary bastalady. Sondyqtan, jattyqtyrýshylar basty nazardy Álem chempıonatyna bólip otyr. Óıtkeni, ol jaqta Olımpıada oıyndaryna joldama sarapqa salynady», - dedi Aıgúl Bektenova.

Buǵan deıin habarlaǵanymyzdaı, 9-14 sáýir aralyǵynda Astanada grek-rım, erkin jáne áıelder kúresinen ótetin 36-shy Azııa chemıponatyna qurlyqtyń 24 elinen 300-den astam balýan qatyspaq.

Azııa chempıonatynda jeńgen balýandardyń jattyqtyrýshylaryna da aqshalaı syıaqy beriledi.