Bálish satqan 3-synyp oqýshylary jınaǵan qarjysyn Oral qalasyna jiberdi
«Sý – tirshilik kózi» atty ashyq sabaq ótken bastaýysh synyp muǵalimi Qyzaıym Altynbekova taqyrypty elimizdegi sý tasqynmen baılanystyrǵan. Zardap shekken halyqqa el bolyp kómek berilip jatqanyn aıtyp, sabaqty keń kólemdi talqylap, túsindirgen. Kúndelikti ómirdi kúrdeli taqyryppen ushtastyra bilgen oqytýshynyń sabaǵyna belsendi qatysqan oqýshylar da sý tasqynynan zardap shekken aımaqtarǵa kómek bergileri keletindigin aıtqan. Sodan erteńine ata-analarynyń kómegimen táttiler pisirip alyp kelgen. Úlken úziliste aktsııa uıymdastyryp, bálish pen táttilerdi satqan. Al túsken qarjy az bolsa da, Oral qalasyna kómek retinde aýdaryldy.
«Aýylymyzdyń turǵyndary sý tasqynynan zardap shekken aımaqtarǵa gýmanıtarlyq kómek jiberdi. Bul iske mektebimizdiń ustazdary da óz úlesin qosty. Igi iske oqýshylarymyz da atsalysyp jatyr. Bul eldegi jaǵdaıǵa búldirshinderimizdiń de beıjaı qaramaǵandyǵyn kórsetip otyr. Jınalǵan qarjy az bolsa da, keń kóńil úshin oqýshylarymyzǵa aıtar alǵysym sheksiz» - deıdi Kókmardan mektebiniń dırektory Bımen Myrzash.