Balkonnan sekireıin dep turǵan qarııany polıtseıler qutqaryp aldy

<p>PAVLODAR. KAZINFORM - Qart otbasymen kıkiljińge kelip, ashý ústinde balkonnyń syrtyna shyǵyp, asylyp turǵan. Polıtseıler men tótenshe jaǵdaı qyzmetkerleri turǵyndy qutqaryp aldy.</p>

Óńirlik Polıtsııa departamentinen habarlaǵandaı, 29 maýsym kúni saǵat 03.40-ta Nazarbaev dańǵyly boıyndaǵy kópqabatty úıdiń balkonynda er adamnyń asylyp turǵany týraly habar túsken. Ol balkonnyń erneýinen ustap, tómenge sekirýge oqtalǵan.

Oqıǵa ornyna patrýldik polıtsııa batalonynyń qyzmetkerleri Janat Danııar, Nurjan Qalıev, Damır Dúısembaev jáne Baýyrjan Nurǵazynov dereý jetti.

«Biz barǵan kezde er adam 8-qabattyń balkonynda asylyp turdy. Birden joǵaryǵa kóterildik. Álgi balkonǵa azamattyń páteri arqyly ǵana kirýge múmkindik boldy. Oqıǵa ornynda tótenshe jaǵdaı qyzmetkerlerimen birge páterdiń esigin ashyp, balkonǵa ótip, áriptesim tómen túsip, er adamdy denesinen baılap, birge joǵary shyǵardyq. Er adam bolǵan oqıǵany túsindirip aıtyp beretindeı jaǵdaıda bolmady. Bólmede biz onymen tildesip, onyń jaqyndaryna kerek ekenin aıttyq. Sol sátte biz úshin eń bastysy adamdy qutqarý boldy. Ár sekýnd mańyzdy boldy», – deıdi qyzmet ınspektory Nurjan Qalıev.

Belgili bolǵandaı, qarııa mundaı áreketke týystarymen janjaldasyp qalǵannan barǵan. Polıtseıler ony jedel járdem qyzmetkerlerine tapsyrdy.

Eske sala keteıik, Astanada 7-synyp oqýshysy balkonǵa ilinip turǵan bes jasar balany qutqardy.