Balqashtyq metsenat turmysy tómen 100 otbasyna azyq-túlik alyp berdi

BALQASh. QazAqparat – Balqash qalasynda turatyn bıznesmen Serik Qasymbekov óz qorynan 100 muqtaj otbasy úshin áleýmettik mańyzy bar azyq-túlik satyp alýǵa 2 mln teńge bóldi, dep habarlaıdy QazAqparat tilshisi.

Osylaısha metsenat «El tiregi – Elbasy» respýblıkalyq aktsııasyna qatysty.

«Igi ister jasaý – halqymyzǵa tán qasıet. Men qalamyzdyń kásipkerlerin qaıyrymdylyqqa belsendi qatysýǵa shaqyramyn», – dedi Serik Qasymbekov.

Azyq-túlik jıyntyǵyna un, makaron, kúrish, qant, ósimdik maıy jáne kámpıtter kirdi. Qaıyrymdylyq kómekti býyp-túıýge jáne tasymaldaýǵa eriktiler qatysty.

«Azyq-túlik sebetterin alý tiziminde múgedektigi bar azamattar, múmkindigi shekteýli balalar, jumyssyzdar, tabysy eń tómengi kúnkóris deńgeıinde bolatyn azamattar bar», – dedi Balqash qalasynyń jumyspen qamtý jáne áleýmettik baǵdarlamalar bóliminiń sektor meńgerýshisi Gúlmıra Mahtbekova.