Balqashtaǵy quıyndy jel: Zardap shekken turǵynnyń jaǵdaıy belgili boldy

BALQASh. QazAqparat – Balqash dárigerleri kópqabatty úıdiń qulaǵan shatyrynan zardap shekken turǵynnyń jaǵdaıy týraly aıtyp berdi, dep habarlaıdy QazAqparat tilshisi.

Keshe saǵat 21.00 shamasynda Balqash qalasynda quıyndy jel saldarynan Qaramende bı kóshesi, 4 mekenjaıyndaǵy turǵyn úıdiń shatyry kókke ushqan bolatyn. Shatyrdyń bir bóligi úıdiń janynan ótip bara jatqan eki kóliktiń ústine tústi. Júrgizýshilerdiń biri zardap shegip, ol aýrýhanaǵa jetkizildi.

«Zardap shekken 1994 jyly týǵan turǵyn mıdyń shaıqalýymen, kontýzııamen jáne moıyn men keýde omyrtqasynyń sozylýymen aýrýhanaǵa jatqyzyldy. Naýqas Balqash qalasynyń kópsalaly aýrýhanasynda, travmatologııa bólimshesine ornalastyryldy. Jaǵdaıy turaqty, qajetti em alyp jatyr», - dep habarlady Qaraǵandy oblysynyń Densaýlyq saqtaý basqarmasynan.

Qazir qala basshysy Sapar Sataevtyń tapsyrmasymen zalal aktisi jasalyp jatyr. Qalpyna keltirý jumystary tótenshe jaǵdaılardy joıý sheńberinde júrgiziletin bolady.

Aıta ketý kerek, daýyl kezinde taǵy bir turǵyn úı zardap shekti. Onyń da shatyry jartylaı búlingen.

Oqıǵa ornynda 8 saǵat boıy shatyr qaldyqtaryn tazartý jumystary júrgizildi.

«Jumysqa 153 adam, sondaı-aq 12 arnaıy tehnıka jumyldyryldy. Tazartý jumystaryna TJD-nyń, Balqash qalasy ákimdiginiń, polıtsııa bóliminiń qyzmetkerleri, sondaı-aq barlyq janashyr turǵyndar qatysty. Balqash qalasynyń ákimshiligi osy jumysqa tartylǵan barlyq adamdarǵa zor alǵys bildiredi», - dep habarlady Balqash qalasy ákimdiginiń baspasóz qyzmetinen.