Balqashta jylý jelisindegi apat saldarynan birneshe dúkendi sý basty

QARAǴANDY. QazAqparat - Qaraǵandy oblysyndaǵy Balqashta eki dúken, fotostýdııa jáne laǵmanhanany sý basyp qaldy, dep habarlaıdy «QazAqparat» HAA tilshisi.

«Sý jylý trans» kommýnaldyq kásipornynyń balansynda turǵan jylý jelisi qysymǵa shydamaı, nátıjesinde birneshe kásipkerlik nysandaryn  ystyq tat sý jaılady.

Zardap shekken kásipkerler sotqa aryz-shaǵymdaryn daıyndap otyr. Olar jaýapker - «Sý jylý trans» memlekettik kommýnaldyq kásipornynan shyǵynǵa ushyraǵan múlikterine aqshalaı ótemaqy talap etpekshi.  

Balqash ákimdigi kásipkerlik bólimi basshysynyń orynbasary Janmıra Rahpanovanyń aıtýynsha, olarǵa memleketten kómek kútýdiń qajeti joq.

«Bul eki taraptyń azamattyq ózara baılanysy. Bul jerde memleket zardap shekken kásipkerlerge qandaı da bir kómek kórsete almaıdy», - dedi Janmıra Rahpanova.