Balqashta ustalǵan brakonerden 84 keli balyq, 400 metr aý tárkilendi
3 qarasha kúni Qaraǵandy oblysy Balqash qalalyq polıtsııa bólimi tabıǵatty qorǵaý bólimshesiniń qyzmetkerleri balyq ınspektsııasy mamandarymen birlesip, «Brakoner» jedel aldyn alý is-sharasyn ótkizdi.
Sharaǵa mamandar tikushaqty paıdalanyp, Balqash kóliniń ústinen zańsyz balyq aýlaýshylardy tekserý maqsatynda ushý jumystaryn júrgizdi. Saǵat 19.30 shamasynda Shubar-Túbek aýylynyń tusynda motorly qaıyqty baıqaǵan. Qaıyqtaǵylar túkushaqty kóre salsymen, qashpaq bolǵan.
Polıtsııa qyzmetkerleri olardyń sońyna túsip, jaǵaǵa jetkende 39 jastaǵy jergilikti turǵyndy ustady. Qaıyqqa tekseris júrgizý barysynda 84 keli balyq jáne 400 metr balyq aýlaıtyn aý tárkilendi. Tabıǵatqa keltirilgen shyǵyn 417 myń teńgeni qurady.
Atalǵan derek boıynsha Qylmystyq kodekstiń 335-babyna sáıkes qylmystyq is qozǵaldy. Tergeý amaldary júrgizilip jatyr.
Foto: polisia.kz