Balqashta taǵy toǵyz kópbalaly otbasy qonys toıyn toılady

BALQASh. QazAqparat – Jańa jyl qarsańynda taǵy toǵyz kópbalaly otbasy Balqashta kópten kútken baspanaǵa ıe boldy. Páter kiltin qala ákimi Oraz Táýirbekov tabystady, dep habarlaıdy QazAqparat tilshisi.

Páterler abattandyrylǵan aýdandarda ornalasqan. Áleýmettik jáne turmystyq ınfraqurylymnyń barlyq nysandary qadamdyq qoljetimdilikte. Turǵyn úı satyp alý quqyǵynsyz jalǵa berildi.

«Jergilikti kásipkerler salǵan jańa úılerden balqashtyqtar páter aldy. Turǵyn úı «Nurly jer» memlekettik baǵdarlamasy aıasynda kommýnaldyq menshikke satyp alyndy. Jańa qonystanýshylar úshin shyn júrekten qýanyshtymyn!» – dedi Oraz Táýirbekov.

Bes balanyń anasy Qyzǵaldaq Atymtaeva 4 bólmeli páterdiń baqytty ıesi atandy. Ol úshin qala basshylyǵy tarapynan jasalǵan jańa jyldyq syı erekshe qýanyshqa aınaldy.

«Barlyǵymyz, ásirese balalar óte baqytty. Ózara bólmelerdi bólip te úlgerdi.

Kezekte bir jyl turdym, sondyqtan tez arada turǵyn úı alamyn dep kútpegen edim. Páterde jóndeý jumystary júrgizilgen, tek kirip, ómir súre bersek bolady.

Ázirge jıhaz jáne basqa zattar joq, biraq biz jaqyn arada kóshýge tyrysamyz», – deıdi ol.

Bıyl Balqashta 51 otbasy baspanaly boldy. Olardyń qatarynda kóp balaly jáne halyqtyń áleýmettik osal toptary bar.