Balqashta sý máselesin sheshý boıynsha sharalar kesheni jasaldy
Qalany sýmen úzdiksiz qamtamasyz etý boıynsha birinshi kezektegi is-sharalar jospary bekitildi. Sondaı-aq Balqashta sý qubyry jelilerin qaıta jańartý jalǵasýda.
Qaraǵandy oblysynyń qalalary men aýyldyq eldi mekenderin sýmen jabdyqtaý týraly apparat keńesinde Energetıka jáne turǵyn úı-kommýnaldyq sharýashylyǵy basqarmasynyń basshysy Erbol Tóleýov baıandady.
«Balqashta 2022 jyly qalanyń sý qubyry jelilerin qaıta salý jobasy bastaldy. Jumystar kezeń-kezeńmen júrgizilýde. Olar 2024 jyly aıaqtalatyny josparlanǵan. Sonymen qatar qalany jáne jaqyn mańdaǵy eldi mekenderdi qorektendiretin Toqyraý sý qubyry tekserildi. Qala ákimdigi sýmen jabdyqtaýdy turaqtandyrý, aýyz sý máselesin keshendi sheshý, sondaı-aq «Balqash sý» jáne «Balqash jylý» kommýnaldyq kásiporyndaryn jańǵyrtý boıynsha birinshi kezektegi sharalardyń tıisti jol kartalaryn ázirledi», – dedi Erbol Tóleýov.
Balqash ákimi Qaırat Qamzınniń aıtýynsha, qala bıýdjetinen qyzmet kórsetýshiler úshin jańa jabdyqtar men materıaldardy satyp alýǵa qarajat bólindi. Osy aptada konkýrs jarııalanady.
Sondaı-aq Erbol Tóleýov oblys boıynsha halyqtyń taza aýyzsýǵa qoljetimdiligin qalaı arttyratynyn aıtyp berdi. Mindet – 2025 jylǵa qaraı 100 % qamtamasyz etý. Qazir oblys qalalarynda kórsetkish 98,5 %, aýyldarda 92,9 % quraıdy.
Bıyl «Qýatty óńirler – el damýynyń draıveri» Ulttyq jobasy aıasynda 39 joba qarjylandyryldy. 390 shaqyrymǵa jýyq sý jáne káriz jelilerin salý jáne qaıta jańartý josparlanýda.
Qaraǵandyda Suryptaý shaǵynaýdanynda sý qubyry jelileriniń qurylysyn aıaqtaý qajet. Sondaı-aq ortalyqtandyrylǵan sýmen jabdyqtaý Sahalın kentinde júrgiziletin bolady, joba ázirlendi.
Temirtaýda sý qubyry jelilerin qaıta jańartý jumystary aıaqtalýǵa jaqyn. Bıyl shamamen 20 km qaldy.
Buqar jyraý, Aqtoǵaı, Qarqaraly, Nura jáne Shet aýdandarynyń 14 aýylynda jańa sý qubyrlary salynyp jatyr.
200-den az adam turatyn aýyldarda sýdy blok-modýldik tazartý keshenderi ornatylady.
«Halyqty sapaly aýyz sýmen qamtamasyz etý – bizdiń basty mindetterimizdiń biri. Barlyq iske asyrylyp jatqan jobalardy ýaqtyly aıaqtap, paıdalanýǵa berý qajet. Jumys barysyn jeke ózim baqylaıtyn bolamyn», – dedi oblys ákimi Ermaǵanbet Bólekpaev.