Balqashta saýyqtyrýdan ótetin erekshe balalardyń sany 2 ese artady

NUR-SULTAN. QazAqparat – «Baldáýren» respýblıkalyq oqý-saýyqtyrý ortalyǵynyń Balqash qalasyndaǵy fılıalynda saýyqtyrýdan ótetin balalardyń sany 2 ese arttyrý máselesi qaralyp jatyr, dep habarlaıdy QazAqparat tilshisi.

QR Premer-Mınıstri Asqar Mamınniń Senat ókilderiniń depýtattyq saýalyna bergen jaýabynda osyndaı málimet aıtylǵan.

«Balalardyń barlyq sanattaryna arnalǵan saýyqtyrý jáne demalys sharalaryn respýblıkalyq deńgeıde «Baldáýren» respýblıkalyq oqý-saýyqtyrý ortalyǵy uıymdastyrdy. Ortalyqta jáne onyń fılıaldarynda jyl saıyn 16 aýysymda 15 498 bala saýyqtyrýdan ótedi. Onyń ishinde 4765 bala jazǵy kezeńde, 10 773 bala oqý jylynyń ýaqytynda (Şýchınsk qalasynda - 4608, Qapshaǵaı qalasynda - 4250, Túrkistan oblysynda - 4160, Balqash qalasynda - 2480) ortalyqta bolady», - dep jaýap berdi Asqar Mamın depýtattardyń saýalyna.

Sondaı-aq, ol «Bilim týraly» Qazaqstan Respýblıkasy Zań boıynsha, joldamalardyń kepildik berilgen kvotasy jetim balalarǵa, ata-anasynyń qamqorlyǵynsyz qalǵan balalarǵa, kóp balaly, az qamtylǵan otbasylardan shyqqan balalarǵa, Qazaqstannyń ekologııalyq qolaısyz óńirlerinen shyqqan balalarǵa, múgedek balalardy tárbıelep otyrǵan otbasylardan shyqqan balalarǵa, tolyq emes otbasylardan shyqqan balalarǵa (20% - 3100 oryn), kórkemóner mektepteriniń shákirtterine (10% - 1150), shyǵarmashylyq baǵyttaǵy balalarǵa (10% - 1150), aýyldy mekenderdiń oqýshylaryna (5% - 775), daryndy balalarǵa (55% - 9 323) usynylatynyn ataǵan.

«2021 jylǵa arnalǵan respýblıkalyq bıýdjette jáne 2022-2024 jyldarǵa arnalǵan respýblıkalyq bıýdjet jobasynda balalardy, onyń ishinde erekshe bilim berilýine qajettiligi bar balalardy (jyl saıyn 18 236 bala) saýyqtyrý, ońaltý jáne olardyń demalysyn uıymdastyrý úshin «Baldáýren» ortalyǵy, «Bóbek» ulttyq ǵylymı-praktıkalyq, bilim berý jáne saýyqtyrý ortalyǵy, «Túzetý pedagogıkasy ortalyǵy» 4 375 994 myń teńge kózdelgen. Erekshe bilim berýge muqtajdyǵy bar bar balalarǵa ortalyqtyń Balqashtaǵy fılıalynda saýyqtyrý jáne ońaltý uıymdastyryldy. Onda jyl saıyn 880 oryn qarastyrylǵan. Saýyqtyrýdyń osy túrimen jyl saıyn qamtylatyn balalardyń sanyn 2 ese ulǵaıtý (1600 bala) máselesi pysyqtalýda», - dep jazylǵan jaýapta.

Asqar Mamınniń aıtýyna qaraǵanda, Qazaqstan boıynsha erekshe bilim berýdi qajet etetin 161 826 bala bar.

«Olardy ońaltýmen densaýlyq saqtaý júıesiniń 36 ońaltý ortalyǵy aınalysady. Onyń ishinde 3 respýblıkalyq jáne 33 óńirlik mekeme bar. Bıyl birinshi jartyjyldyqta erekshe bilim berý muqtajdyǵy bar 31 671 bala medıtsınalyq ońaltýdan ótti», - dep jazady Úkimet basshysy.